प्रेस युनियन आक्रोशित, सदस्यता नटुंग्याई अघि नबढ्न पत्रकार महासंघलाई चेतावनी

समाचार

गृहपृष्ठ
समाचार
प्रेस युनियन आक्रोशित, सदस्यता नटुंग्याई अघि नबढ्न पत्रकार महासंघलाई चेतावनी

प्रेस युनियन आक्रोशित, सदस्यता नटुंग्याई अघि नबढ्न पत्रकार महासंघलाई चेतावनी

शुक्रबार, असार १४, २०८१ बागेश्वरी पोस्ट

नेपालगञ्ज । नेपाल प्रेस युनियनले विधि बमोजिम सदस्यता विवाद नटुङ्ग्याई निर्वाचनमा गए नेपाल पत्रकार महासंघको निर्वाचन प्रक्रियामा सहभागी नहुने चेतावनी दिएको छ ।

अध्यक्ष शिव लम्सालले आज प्रेस विज्ञप्ति जारी गर्दै महासंघ नेतृत्वले युनियनसँग गरेको सदस्यता सम्बन्धि प्रतिबद्धता कार्यान्वयन नगरी एकपक्षीय रूपमा निर्वाचन प्रक्रिया अगाडि बढाए भाग नलिई चरणबद्ध आन्दोलनमा जान बाध्य हुने चेतावनी दिएका छन् । युनियनले उठाएका विषयलाई बेवास्ता गरेर अघि बढेमा त्यसबाट उत्पन्न हुन सक्ने परिस्थितिको जिम्मेवार स्वयं महासंघको नेतृत्व हुने विज्ञप्तीमा उल्लेख छ ।

सदस्यता विवादलाई विधान अनुसार टुङ्ग्याउन महासंघको नेतृत्वले उदासिनता देखाएकोप्रति गम्भीर ध्यानाकर्षण भएको भन्दै लम्सालले शाखा र प्रदेशले सिफारिस गरेका सदस्यलाई हटाएर महासंघको केन्द्रीय समितिले कुनै संरचनाले सिफारिस नगरेका गैरपत्रकारलाई समावेश गरेर सार्वजनिक गरिएको मतदाता नामावलीप्रति यसअघि नै असहमति जनाइसकेको स्मरण गराएका छन् ।

युनियनले असार ९ गते पत्रकार महासंघको सदस्यता विवाद लगायतका समस्या सम्बोधन गरेर निर्वाचनको वातावरण तयार गर्न आग्रह गर्दै ५ बुँदे मागसहित २४ घण्टे ध्यानाकर्षण गराएको स्मरण गराएको छ ।

May be an image of text