पहिरोमा परेर गुल्मी र स्याङ्जामा सात जनाको मृत्यु

समाचार

गृहपृष्ठ
समाचार
पहिरोमा परेर गुल्मी र स्याङ्जामा सात जनाको मृत्यु

पहिरोमा परेर गुल्मी र स्याङ्जामा सात जनाको मृत्यु

एकै परिवारका पाँच जना बिते

शनिबार, असार १५, २०८१ बागेश्वरी पोस्ट

गुल्मी । गएरातिको अविरल वर्षाका कारण आएको पहिरोमा परेर एकै घरका ५ जनाको मृत्यु भएको छ ।

गुल्मीको मालिका गाउँपालिका-६ कँँडेल पाटामा स्थानीय भेषबहादुर बिकको घर पहिरोले पुरिँदा ५ जनाको मृत्यु भएको गुल्मी प्रहरीले जनाएको छ ।

प्रहरीका अनुसार पहिरोले घर पुर्दा ५५ वर्षीय भेषबहादुरसहित उनकी ४८ वर्षीया श्रीमती सुन्तली कामी, २६ वर्षीया बुहारी सीता बिक, ८ वर्षीया नातिनी सपना बिक र ८ महिने नातिनी बिना बिकको मृत्यु भएको हो । उनीहरुको शव केही पर फेला परेको हो ।

पहिरो कति बेला गएको भन्ने बारेमा कुनै जानकारी नभएपनि आज बिहान मात्रै घटनाबारे प्रहरीले जानकारी पाएको जनाएको छ ।

त्यसैगरी भीषण वर्षासँँगै आएको पहिरोले घर बगाउँदा स्याङ्जामा आमाछोरीको मृत्यु भएको छ । गएराति ११ बजे स्याङ्जाको फेदीखोला गाउँपालिका-५ स्थित स्थानीय दुर्गा जिटीको घर पहिरोले बगाएको प्रहरीले जनाएको छ ।

प्रहरीका अनुसार पहिरोले घर बगाउँदा दुर्गा र उनकी ३ वर्षीया छोरीको मृत्यु भएको हो ।

उनीहरु घरमा सुतिरहेको समयमा घर भन्दा २५-३० मिटर माथिबाट खसेको पहिरोले घर बगाएर उनीहरुलाई पुरेको स्याङ्जा प्रहरीले जानकारी दिएको छ ।

प्रकाशित मिति: शनिबार, असार १५, २०८१ १०:५०

प्रतिक्रिया दिनुहोस्