प्रेस काउन्सिल पत्रकारिता क्षेत्रका समस्या सुल्झाउन केन्द्रित छ-अध्यक्ष बस्नेत

समाचार

गृहपृष्ठ
समाचार
प्रेस काउन्सिल पत्रकारिता क्षेत्रका समस्या सुल्झाउन केन्द्रित छ-अध्यक्ष बस्नेत

प्रेस काउन्सिल पत्रकारिता क्षेत्रका समस्या सुल्झाउन केन्द्रित छ-अध्यक्ष बस्नेत

बुधबार, असार २६, २०८१ बागेश्वरी पोस्ट

नेपालगञ्ज । प्रेस काउन्सिल नेपालका अध्यक्ष बालकृष्ण बस्नेतले प्रेस काउन्सिल पत्रकारिता क्षेत्रका समस्या सुल्झाउन केन्द्रित रहेको बताएका छन् । प्रेस काउन्सिल नेपालको आयोजना एवम् नेपाल पत्रकार महासंघ बाँकेको संयोजनमा आज नेपालगञ्जमा आयोजित पत्रकारितामा 'युट्युबसहित सामाजिक सञ्जालको प्रभाव' विषयक कार्यक्रममा बोल्दै बस्नेतले नेपाली पत्रकारिताको ट्र्याक बदल्नुपर्ने बेला आएको बताए ।

नेपाली पत्रकारिता समस्या उठानमा मात्र केन्द्रित रहेको भन्दै उनले अब समस्या समाधानमा समेत केन्द्रित हुनुपर्ने उल्लेख गरे । बस्नेतले पत्रकारहरुले आफ्नो कार्यशैलीमा पुनरावलोकन गर्नुपर्नेमा जोड समेत दिए । सामाजिक सञ्जाल र युट्युब मूलधारका मिडियाका लागि चुनौती बनेको बताउँदै उनले समयसान्दर्भिक, मर्यादित र स्वस्थ पत्रकारिता अहिलेको आवश्यकता रहेको उल्लेख गरे । उनले मिडियामा देखिएको संकट समाधानका लागि राज्य पनि गम्भीर बन्नुपर्ने बताए । बस्नेतले मिडियाको दीर्घ जीवनका लागि 'मर्जर'को नीति लिनुपर्ने अवस्था आएको समेत बताए ।

कार्यक्रममा नेपाल पत्रकार महासंघ लुम्बिनी प्रदेश उपाध्यक्ष शुक्रऋषि चौलागाई, प्रेस काउन्सिल नेपालका सदस्य शरद अधिकारी, नेपाल पत्रकार महासंघ बाँकेका कार्यवाहक अध्यक्ष संगिन शर्मा लगायतले जिम्मेवारीपूर्ण र मर्यादित पत्रकारितामा जोड दिएका थिए । अन्तरक्रियामा वरिष्ठ पत्रकार एवम् नेपाल पत्रकार महासंघका पूर्व केन्द्रीय सदस्य झलक गैरेले अहिलेको पत्रकारिताको प्रवृत्ति र नयाँ मिडियाको चुनौतीबारे प्रस्तुतिकरण गरेका थिए । कार्यक्रमको सहजीकरण सचिव कमल डाँगीले गरेका थिए ।

प्रकाशित मिति: बुधबार, असार २६, २०८१ २१:००

प्रतिक्रिया दिनुहोस्