आफू मरेर यात्रु जोगाएका बस चालकलाई सरकारले मरणोपरान्त सम्मान गर्ने

समाचार

गृहपृष्ठ
समाचार
आफू मरेर यात्रु जोगाएका बस चालकलाई सरकारले मरणोपरान्त सम्मान गर्ने

आफू मरेर यात्रु जोगाएका बस चालकलाई सरकारले मरणोपरान्त सम्मान गर्ने

मंगलबार, साउन २२, २०८१ बागेश्वरी पोस्ट

काठमाडौं । पहाडमाथिबाट खसेको पहिरोको ढुङ्गा लागेर आफू मरेर पनि दर्जनौं यात्रुहरुलाई बचाएका बस चालक मेघनाथ विकलाई सरकारले मरणोपरान्त सम्मान गर्ने भएको छ ।

गत असार २८ गते चितवनको भरतपुर महानगरपालिका-२९ सत्रकिलोमा माथिबाट खसेको ढुङ्गा लागेर मृत्यु भएका ३६ वर्षीय बस चालक विकलाई विपद व्यवस्थापन कार्यकारी समितिको बैठकले स्व. विकका परिवारलाई राहत रकमसहित सम्मान गर्ने निर्णय गरेको हो ।

नारायणगढ-मुग्लिन सडकखण्डमा ढुङ्गा आफूलाई लागेर च्यापिँदा समेत तुरुन्त बसको ब्रेक लगाएर बसमा सवार ३० यात्रुलाई जोगाउँदा उनको घटनास्थलमै मृत्यु भएको थियो । उनले उक्त बसको ब्रेक नलगाएको भए बस सोझै त्रिशूूली नदीमा खस्ने पक्कै थियो तर आफूलाई त्यति ठुलो ढुङ्गा लागेर च्यापिँदा समेत तुरुन्त बसको ब्रेक लगाएर चालक विकले सबै यात्रुको ज्यान बचाउन सफल भएका थिए ।

गत असार २८ गते बुटवलबाट काठमाडौं आइरहेको लु २ ख ६५६६ नम्बरको बस चालक विक चालक सिटमै बसेको अवस्थामा भिरबाट खसेको ढुंगाले किचिएका थिए । उनलाई तत्कालै उपचारका लागि चितवन मेडिकल कलेज लगिए पनि चिकित्सकले मृत घोषणा गरेका थिए ।

स्व. चालक नवलपरासीको सुनवल नगरपालिका-४ का स्थायीवासी थिए । आफू मर्दा समेत ३० यात्रुलाई जोगाएका कारण उनको चौतर्फी प्रशंंसा हुँदै आएको छ । सरकारले आफूले ज्यान गुमाएर समेत सबै यात्रुको ज्यान जोगाउन सफल उनको त्यो बहादुरीपूूर्ण कार्यको उच्च कदर गर्दै मरणोपरान्त उनलाई सम्मान गर्न लागेको हो । उनलाई मरणोपरान्त कुन सम्मान र कति राहत रकम दिने भन्ने बारेमा सरकारले अझै केही बताएको भने छैन ।

प्रकाशित मिति: मंगलबार, साउन २२, २०८१ १०:१९

प्रतिक्रिया दिनुहोस्