नीलसागर सेवाश्रमलाई कोहलपुर उद्योग बाणिज्य संघको सहयोग

समाचार

गृहपृष्ठ
समाचार
नीलसागर सेवाश्रमलाई कोहलपुर उद्योग बाणिज्य संघको सहयोग

नीलसागर सेवाश्रमलाई कोहलपुर उद्योग बाणिज्य संघको सहयोग

सोमबार, भदौ १७, २०८१ बागेश्वरी पोस्ट

नेपालगन्ज । कोहलपुरमा रहेको नीलसागर सेवाश्रमलाई कोहलपुर उद्योग वाणिज्य संघले खाद्यान्न, लत्ताकपडासहित आर्थिक सहयोग हस्तान्तरण गरेको छ ।

कुशे औंशी तथा बुवाको मुख हेर्ने दिनको सन्दर्भमा संघले आज एक कार्यक्रमका बीच सहयोग हस्तान्तरण गरेको हो । सामाजिक उत्तरदायित्व बहन अन्तर्गत संघले यसपटक पनि नीलसागर कोहलपुरलाई सहयोग गरेको बताइएको छ ।

“चाड पर्वहरु नजिकिँदै गर्दा नीलसागरमा आश्रित जेष्ठ एवम् असहाय नागरिकहरुमा चाडपर्वको उत्साह एवम् हर्ष–उल्लास बढाउन हामीले सहयोग हस्तान्तरण गरेका छौं,” संघका अध्यक्ष लक्ष्मणराज पौडेलले बताए । अध्यक्ष पौडेलका अनुसार मानवीय सेवाभावलाई आत्मसाथ गर्दै हरितालिका तीजको अवसरमा अन्य खर्चिला गतिविधिहरु गर्नु भन्दा परिवार र घरवारविहिन असहाय एवम् वेवारिसे अवस्थाबाट उद्धार गरिएका नागरिकहरुमा एक दिन भए पनि खुशीयाली साट्न तीजको दर खाने कार्यक्रमसँगै सहयोग कार्यक्रमलाई निरन्तरता दिइएको हो ।

गत वर्ष पनि कुशे औंशी तथा बुवाको मुख हेर्न दिनको अवसरमा संघले नीलसागर कोहलपुरलाई खाद्यान्नसहित नगद सहयोग गरेको थियो । सहयोग हस्तान्तरण कार्यक्रममा बोल्दै संघका संस्थापक अध्यक्ष कर्ण बहादुर थापाले मानवीय सेवा नै परम् धर्म भएकाले सबै नागरिकहरुमा मानवीय सेवा भावको विकास हुनुपर्नेमा जोड दिए । उनले बुवाको मुख हेर्ने दिनको अवसरमा स्वर्गीय वुवाको स्मृतिमा ७ हजार १ सय नीलसागरलाई सहयोग उपलब्ध गराएका छन् । यस्तै संघका कार्यालय प्रमुख धन प्रसाद धितालले पनि नीलसागरलाई स्वर्गीय बुवाको स्मृतिमा २५ केजी चिउरा र लत्ताकपडा सहयोग हस्तान्तरण गरेका छन् ।

संघले १० बोरा चामल, १० केजी दाल, १ पेटी तेल, नुन लगायत लत्ताकपडा नीलसागर कोहलपुर प्रमुख अञ्जु न्यौपानेमार्फत सहयोग हस्तान्तरण गरेको हो । सहयोग हस्तान्तरण कार्यक्रममा संघका पूर्व अध्यक्षहरु राजेन्द्र श्रेष्ठ, चिन्तामणि धिताल, वर्तमान कार्यसमिति पदाधिकारी तथा कार्यसमिति सदस्यहरु, पत्रकार लगायतको उपस्थिति रहेको थियो ।

प्रकाशित मिति: सोमबार, भदौ १७, २०८१ १३:२६

प्रतिक्रिया दिनुहोस्