लुम्बिनीका ६ जिल्लामा बडका अत्तवारीको सार्वजनिक विदा

समाचार

गृहपृष्ठ
समाचार
लुम्बिनीका ६ जिल्लामा बडका अत्तवारीको सार्वजनिक विदा

लुम्बिनीका ६ जिल्लामा बडका अत्तवारीको सार्वजनिक विदा

बुधबार, भदौ १९, २०८१ बागेश्वरी पोस्ट

नेपालगन्ज । लुम्बिनी प्रदेश सरकारले बडका अत्तवारी पर्वको अवसरमा लुम्बिनी प्रदेशका थारू समुदायको बसोवास धेरै रहेका ६ जिल्लामा सार्वजनिक विदा दिने भएको छ ।

थारु समुदायको बसोजास बढी रहेको दाङ, बाँके, बर्दिया, कपिलवस्तु, रूपन्देही र पश्चिम नवलपरासीमा सार्वजनिक बिदा दिने सूचना आन्तरिक मामिला तथा कानुन मन्त्रालयले सार्वजनिक गरेको छ । थारू समुदायमा महत्वका साथ मनाइने बडका अत्तवारी पर्व यस बर्ष भदौ २३ गते आइतबार परेको छ ।

यो पर्वमा थारू समुदायका पुरुषहरू उपवास ‘ब्रत’ बस्ने चलन छ । यो पर्वमा निराहार व्रत बसी सूर्यको पूजा गरी मनाइने सांस्कृतिक मान्यता छ । थारू समुदायले सूर्यलाई उज्यालोको प्रतीकको रूपमा मान्दै आएका छन् । पौराणिक कथा अनुसार भीमको पूजा गरेर पनि अट्वारी पर्व मनाउने प्रचलन छ । कुशे औंसीपछिको पहिलो आइतबार यो पर्व मनाउने गरिन्छ ।

आइतवार मनाइने हुँदा यो पर्वको नाम अत्तवारी राखिएको मान्यता छ । आइतवारलाई रविवार पनि भनिन्छ । रवि अर्थात् सूर्य । सूर्य अग्निको प्रतीक पनि हो । प्रकृति पूजक थारू समुदायले विशेष गरी सूर्यको उपासना, पूजाआजा गरी बडका अत्तवारी पर्व धुमधामका साथ मनाउने प्रचलन रहिआएको छ ।

प्रकाशित मिति: बुधबार, भदौ १९, २०८१ २०:१९

प्रतिक्रिया दिनुहोस्