लुम्बिनी प्रदेशका सांसद धनबहादुर केसी (डिबी) कारागार चलान

राजनीति

गृहपृष्ठ
राजनीति
लुम्बिनी प्रदेशका सांसद धनबहादुर केसी (डिबी) कारागार चलान

लुम्बिनी प्रदेशका सांसद धनबहादुर केसी (डिबी) कारागार चलान

आइतबार, भदौ २३, २०८१ बागेश्वरी पोस्ट

नेपालगञ्ज । रुकुम पूर्वबाट निर्वाचित लुम्बिनी प्रदेशका सांसद धनबहादुर केसी (डिबी) कारागार चलान भएका छन् । सांसद केसी आज आफैं रुकुमकोट जिल्ला अदालतमा पुगेर आत्मसमर्पण गरेपछि कारागार चलान भएका हुन् ।

रुकुम पूर्वका प्रमुख जिल्ला अधिकारी माधवप्रसाद शर्माले रुकुम पूर्वबाट निर्वाचित लुम्बिनी प्रदेश सांसद केसी आफैं रुकुम पूर्वको रुकुमकोट जिल्ला अदालतमा उपस्थित भएको जानकारी दिए । त्यस्तै रुकुम पूर्वका प्रहरी प्रमुख तथा डिएसपी माधव राज खरेलले पनि रुकुम पूर्वबाट निर्वाचित लुम्बिनी प्रदेश सांसद केसी रुकुमकोट जिल्ला अदालतमा आफैं उपस्थित भएको र रुकुमकोट जिल्ला अदालतले तोकिएको सजाय भुक्तान गर्न रुकुम पश्चिम कारागार पठाएको बताएका छन् ।

स्रोतका अनुसार प्रहरीले केसीलाई काठमाडौँबाट नियन्त्रणमा लिएको बुझिएको छ । सांसद केसीलाई प्रहरीले रूकुम पूर्व ल्याएको थियो । तर, केसी आफैं अदालतमा उपस्थित भएको बताइएको छ । सांसद केसीलाई ३३ वर्ष पहिले साविक रुकुम जिल्ला अदालतले किर्ते मुद्दामा दोषी ठहर गर्दै एक वर्ष कैद र दुई हजार रुपैयाँ जरिवानाको फैसला सुनाएको थियो । तर, त्यसयता सांसद केसी फरारको सूचीमा रहँदै आएका थिए ।

श्रीमतीसँगको अंश मुद्दामा प्रदेश सांसद केसीले किर्ते गरेको अभियोगमा साविक रुकुम जिल्ला अदालतमा मुद्दा परेको र त्यसमा सांसद केसी दोषी ठहर भई अदालतले एक वर्ष कैद र दुई हजार रुपैयाँ जरिवाना गरे पनि हालसम्म सांसद केसीले सजाय भुक्तान भने गरेका थिएनन् ।

गत निर्वाचनमा केसी नेपाली कांग्रेसको तर्फबाट रूकुम पूर्वको प्रदेश सभा क्षेत्र नम्बर १ को १ बाट निर्वाचित भएका थिए ।

प्रकाशित मिति: आइतबार, भदौ २३, २०८१ २१:०९