'लागूऔषध प्रयोगकर्ता बिरामी हुन्, उनीहरुलाई उपचारको खाँचो छ’

समाचार

गृहपृष्ठ
समाचार
'लागूऔषध प्रयोगकर्ता बिरामी हुन्, उनीहरुलाई उपचारको खाँचो छ’

'लागूऔषध प्रयोगकर्ता बिरामी हुन्, उनीहरुलाई उपचारको खाँचो छ’

मंगलबार, असोज १, २०८१ बागेश्वरी पोस्ट

नेपालगन्ज । लागूऔषधविरुद्ध काम गर्ने नेपालका प्रमुख संस्था मध्यको एक हो, रिकभरिङ्ग नेपाल । लागूऔषध प्रयोगकर्ताको हितमा काम गर्ने रिकभरिङ्ग नेपालले सातै वटा प्रदेशमा लागूऔषध प्रयोगकर्ता बिरामी हुन् र उनीहरुलाई उपचारको खाँचो छ भन्ने कुरालाई जोड दिँदै काम गरिरहेको बताएको छ ।

आज रिकभरिङ्ग नेपाल लुम्बिनी प्रदेशले नेपालगन्जमा पत्रकार सम्मेलनको आयोजना गरेर रिकभरिङ्ग नेपालले गरिरहेको कामहरुका बारेमा जानकारी दिएको छ । रिकभरिङ्ग नेपाल लुम्बिनी प्रदेशकी अध्यक्ष इन्द्रा कुमारी जिसीले लागूऔषधका विषयमा नेपाल सरकारको दोहोरो नीतिका कारण काम गर्न असहज भएको बताइन् । ‘लागूऔषधका विषयमा नेपाल सरकारकै नीति नै बाझिने खालको छ । स्वास्थ्य मन्त्रालयले लागूऔषध प्रयोगकर्तालाई बिरामीको रुपमा हेरेको छ भने गृह मन्त्रालयले लागूऔषध प्रयोगकर्तालाई अपराधीको रुपमा हेरेको छ,’ अध्यक्ष जिसीले भनिन् । उनले रिकभरिङ्ग नेपालले भने लागूऔषध प्रयोगकर्तालाई बिरामीको रुपमा हेर्ने गरेको बताउँदै उनीहरुलाई लागूऔषधबाट बाहिर निकाल्न, उनीहरुलाई एचआभी, हेपाटाइटिस जस्ता रोगहरुबाट जोगाउने काम रिकभरिङ्ग नेपालले गरिरहेको बताइन् ।

कार्यक्रममा रिकभरिङ्ग नेपाल लुम्बिनी प्रदेश फोकल पर्सन प्रविण बिसीले लागूऔषध सम्बन्धि ऐन, नियमलाई सुधार्न रिकभरिङ्ग नेपाल लागिपरेको बताए । बिसीले विश्व स्वास्थ्य संगठनले समेत लागूऔषध प्रयोगकर्तालाई बिरामीको संज्ञा दिइसकेको अवस्थामा नेपाल सरकार भने अझै अलमलमा परेको जिकिर गरे ।

रिकभरिङ्ग नेपाल लुम्बिनी प्रदेशकी महासचिव यशोदा ज्ञवालीले महिला लागूऔषध बिरामीका लागि झनै समस्या रहेको बताइन् । उनले सरकारको ऐन नै बाझिने र सरकारले लागूऔषध बिरामीका लागि एउटा पनि सुधार गृह स्थापना गर्न नसक्नु सरकारको कमजोरी रहेको बताइन् ।

त्यसैगरी पत्रकार सम्मेलनमा रिकभरिङ्ग नेपालले ६ महिनाको कार्यक्रम पनि सार्वजनिक गरेको छ । अगष्ट २०२४ देखि जनवरी २०२५ सम्म रिकभरिङ्ग नेपालले लुम्बिनी प्रदेशमा लागूऔषध बिरामीका लागि गर्ने कार्यक्रमको तालिका सार्वजनिक गरेको छ । जसमा विभिन्न चरणमा विभिन्न क्षेत्रका व्यक्तिहरुसँगको बैठक, छलफल तथा अन्तरक्रियाहरु रहेका छन् । उक्त कार्यक्रमको माध्यमबाट लागूऔषध बिरामीका समस्या पहिचान, उनीहरुको आवश्यकता तथा हक अभिकारका बारेमा ड्राफ्ट तयार पार्ने र स्थानीय सरकार तथा नेपाल सरकारलाई सो ड्राफ्टप्रति उत्तरदायी गराउने लक्ष्य लिइएको महासचिव ज्ञवालीले जानकारी दिएकी छिन् ।

प्रकाशित मिति: मंगलबार, असोज १, २०८१ १८:४०

प्रतिक्रिया दिनुहोस्