बाढी-पहिरोमा परी बागमती र कोशीमा ३७ जनाको मृत्यु

समाचार

गृहपृष्ठ
समाचार
बाढी-पहिरोमा परी बागमती र कोशीमा ३७ जनाको मृत्यु

बाढी-पहिरोमा परी बागमती र कोशीमा ३७ जनाको मृत्यु

शनिबार, असोज १२, २०८१ बागेश्वरी पोस्ट

काठमाडौं । शुक्रबारदेखि लगातार परिरहेको अविरल वर्षाका कारण काठमाडौं उपत्यका र कोशी प्रदेशमा अहिलेसम्म ३७ जनाको मृत्यु भएको छ । काठमाडौंका तीन जिल्लामा मात्र ३२ जनाको मृत्यु भएको छ । उपत्यका प्रहरी कार्यालय, रानीपोखरीका एसएसपी विनोद घिमिरेका अनुसार, बाढीमा परेर काठमाडौंमा ११, ललितपुरमा १६ र भक्तपुरमा ५ जनाको मृत्यु भएको छ ।

एसएसपी घिमिरेका अनुसार, काठमाडौंमा १०, ललितपुरमा ५ र भक्तपुरमा २ जना घाइते छन् भने काठमाडौंमा १ र ललितपुरमा ११ गरी १२ जना बेपत्ता छन् । प्रहरीका अनुसार, काठमाडौंमा २२६ घर डुबानमा परेका छन् भने नेपाल प्रहरीबाट एसएसपीको नेतृत्वमा ३ हजार ६० जनाको उद्दार टोली खटिएको छ ।

ललितपुरका पनि अधिकांश स्थानमा पानी पसेको छ । नख्खु खोलामा उद्दारमा ढिलाई हुँदा शनिबार बिहान ४ जना बेपत्ता भएका थिए । तर, केही तल तीन जनालाई प्रहरी र स्थानीय मिलेर उद्दार गरेका छन् । ललितपुर प्रहरी प्रमुख एसएसपी शेखर खनालका अनुसार, उद्दार गरेर प्रहरी प्रभाग भैंसेपाटीको गाडीमा पाटन अस्पताल पुर्याइएको छ ।

भक्तपुरमा पनि अधिकांश स्थानमा पानी पसेको छ भने प्रहरी उपरीक्षकको कमाण्डमा १२० जना प्रहरी परिचालित भएको घिमिरेले बताए ।

एसएसपी घिमिरेका अनुसार, काठमाडौंबाट विपद् व्यवस्थापन महाशाखा सामाखुशीबाट प्रहरी निरीक्षकको नेतृत्वमा ४० जनाको टोली पनि परिचालित छ ।

त्यस्तै ललितपुरमा पनि प्रहरी निरीक्षकको कमाण्डमा सामाखुशीबाट २५ जनाको टोली परिचालित छ । ललितपुरमा प्रहरीको विशेष सुरक्षा गण त्रिपुरेश्वरबाट पनि ३० जना खटिएका छन् । भक्तपुरमा सामाखुशीबाट १५ जनाको टोली खटिएको छ ।

विपद उद्दार तथा व्यवस्थापनका लागि सशस्त्र प्रहरी बलको टोली पनि परिचालित छ । सशस्त्र प्रहरीका डीएसपी शैलेन्द्र थापाका अनुसार, उपत्यकामा २३ वटा ढुंगासहित १ हजार ५१२ जनाको टोली उद्दार कार्यमा परिचालन गरिएको छ ।

त्यसैगरी कोशी प्रदेशमा लगातारको भीषण वर्षासँगै बाढी र पहिरोमा परेर मृत्यु हुनेको संख्या ५ पुगेको छ । बाढी र पहिरोमा परी ९ जना बेपत्ता भएका छन् ।

कोशी प्रहरी प्रहरी कार्यालयका अनुसार पाँचथरमा ४ र धनकुटामा १ जनाको मृत्यु भएको छ । पाँचथरमा पहिरोमा परी ४ जना बेपत्ता भएका छन् । खोलाले बगाउँदा झापा, मोरङ र इलाममा ५ जना बेपत्ता भएका छन् ।

प्रकाशित मिति: शनिबार, असोज १२, २०८१ १४:३२

प्रतिक्रिया दिनुहोस्