राष्ट्रिय सभा अनुकुल हुनासाथ संविधान संशोधन अघि बढ्छ: शंकर पोखरेल

राजनीति

गृहपृष्ठ
राजनीति
राष्ट्रिय सभा अनुकुल हुनासाथ संविधान संशोधन अघि बढ्छ: शंकर पोखरेल

राष्ट्रिय सभा अनुकुल हुनासाथ संविधान संशोधन अघि बढ्छ: शंकर पोखरेल

बिहीबार, कात्तिक १, २०८१ बागेश्वरी पोस्ट

नेपालगन्ज । नेकपा एमालेका महासचिव शंकर पोखरेलले कांग्रेस-एमाले सरकार संविधान संशोधन गर्ने निश्चित उद्देश्यका साथ निर्माण भएको बताएका छन् ।

नेकपा एमाले नेपालगन्ज नगर कमिटीद्वारा आज नेपालगन्जमा आयोजित अगुवा कार्यकर्ता भेलालाई सम्बोधन गर्दै महासचिव पोखरेलले अहिले राष्ट्रिय सभामा बहुमत नभएका कारण तत्काल संविधान संशोधन प्रक्रिया अघि नबढाउने स्पष्ट पार्दै एक-डेढ वर्षमा बहुमत पुगेपछि संविधान संशोधनमा जाने बताए । उनले वर्तमान सरकार उच्च समझदारीमा निश्चित उद्देश्य लिएर बनेकोले कसैले चाहँदैमा सरकार नढल्ने स्पष्ट पारे । सरकार ढल्छ भनी हल्ला फिँजाउनेहरु विकास र स्थिरता विरोधी भएको उनको टिप्पणी छ । आगामी चुनावसम्म यो सरकार कायमै रहने दाबी गर्दै पोखरेलले चुनावी सरकारको नेतृत्व कांग्रेसले गर्ने स्पष्ट पारे । आगामी चुनावमा कांग्रेस र एमालेले कसैसंग तालमेल नगर्ने उनको दाबी छ ।

महासचिव पोखरेलले एमाले मिसन २०८४ को मूलमन्त्रका साथ अघि बढेको बताए ।राजनीतिक अस्थिरताको अन्त्यका लागि उनले २०८४ को निर्वाचनमा एमालेको एकल बहुमतको सरकार आवश्यक रहेको बताए । त्यसै अनुरुप पार्टीका गतिविधिलाई तल्लो तहसम्म संचालन गर्न उनले नेता कार्यकर्तालाई निर्देशन दिए । जनताका काम र समस्यामा ध्यान दिन उनको जोड छ ।

व्यवसायी मीन बहादुर गुरुङले दान गरेको जग्गाको विषयलाई अतिरन्जित गर्न खोजिएको भन्दै उनले पार्टी शुभेच्छुकले स्वेच्छिकरुपमा दिएको कुरालाई अनावश्यक टीका-टिप्पणी गर्न जरुरी नभएको स्पष्ट पारे ।

भेलालाई एमाले केन्द्रीय सदस्य एवम् बाँके जिल्ला इन्चार्ज शान्ति ढकाल र जिल्ला अध्यक्ष निरक गुरुङले पनि सम्बोधन गरेका थिए । नेकपा एमाले नेपालगन्ज नगर कमिटी अध्यक्ष मोहित शाहको अध्यक्षतामा अगुवा कार्यकर्ता भेला सम्पन्न भएको हो ।

प्रकाशित मिति: बिहीबार, कात्तिक १, २०८१ १७:४५

प्रतिक्रिया दिनुहोस्