बैकुण्ठधाम आध्यात्मिक महोत्सबमा भरिभराउ भक्तजन

समाचार

गृहपृष्ठ
समाचार
बैकुण्ठधाम आध्यात्मिक महोत्सबमा भरिभराउ भक्तजन

बैकुण्ठधाम आध्यात्मिक महोत्सबमा भरिभराउ भक्तजन

पाँचौं दिनमा २५ लाख बढी संकलन

मंगलबार, कात्तिक २७, २०८१ बागेश्वरी पोस्ट

नेपालगञ्ज । प्रस्तावित बैकुण्ठधाम सिधनियाघाट निर्माण सहयोगार्थ नेपालगञ्जमा जारी बैकुण्ठधाम आध्यात्मिक महोत्सवमा कथा वाचनको पाँचौं दिन पुग्दा भक्तजन र श्रोताको उल्लेख्य उपस्थिति देखिएको छ । स्थानीय चलनचल्तीको हिन्दी भाषामा भागवत कथा वाचनको प्रवचन सुन्न नेपालगञ्जका स्थानीयबासीको आजको महायज्ञमा ठूलो संख्यामा सहभागिता रहेको थियो ।

आयोजक समितिबाट २५ हजारको दान रकमबाट घटाएर ११ हजार बढी दान गर्नेहरुको नाम शिलालेखमा राख्ने निर्णय भएसँगै आज पनि शिलालेखमा नाम लेखाउन भन्दै २०० बढीले ११ हजार बढीको दान गरे भने यसअघि ११ हजार भन्दा कम दान गरेका भक्तजनबाट पनि थप रकम दान गरेर शिलालेखमा नाम दर्ज गर्न आएको आयोजकले जनाएको छ ।

कथा वाचनको पाँचौं दिन २५ लाख बढी दान संकलन भएको महोत्सव आयोजक समितिको आर्थिक उपसिमितले जानकारी दिएको छ । वाचन शिरोमणि पण्डित दीनबन्धु पोखरेलबाट संगीतमय भागवत वाचन श्रवण गर्न आज पनि महायज्ञमा नेपालगञ्जका स्थानीय बैश्य, मारवाडी र मधेशका स्थानीयबासीको उल्लेख्य उपस्थिति रहेको थियो ।

वाचन शिरोमणि पण्डित पोखरेलको प्रमुख वाचनमा जारी आध्यात्मिक महोत्सवको पाँचौं दिनमा पनि महोत्सवमा संगीतमय कलाकार टोलीबाट आलाङ्कारिक नाट्य प्रदर्शन भएको छ । भागवत कथामा आधारित नाट्य मञ्चनलाई सहभागीले अभिरुचीपूर्वक श्रवण गरेका थिए ।

आर्थिक समितिले दिएको जानकारी अनुसार कथा प्रवचनका बीच नेपालगञ्जका प्रतिष्ठित पर्यटन व्यवसायी लोकेन्द्र अर्यालले यसअघि बोलेको दान रकममा थप गरेर दान रकम १० लाख ११ हजार ५५५ रुपैयाँ पुर्याए । आजै नेपालगञ्ज-२ की पद्मादेवी रिजालबाट १ लाख ११ हजार १११ रुपैयाँ, पदमबहादुर घर्ती मगरबाट १ लाख १ हजार १११ रुपैयाँ प्रदान भएको आर्थिक संयोजक कृष्णप्रसाद श्रेष्ठले जानकारी दिए ।

उनका अनुसार पूर्व प्रहरी संगठनको तर्फबाट ६५ हजार २०५, नेपालगञ्ज २ की अनिता पौडेलबाट ५५ हजार ५५५, शिला श्रेष्ठबाट ५५ हजार ५५५, राँझा निवासी डिल्लीराज रेग्मीबाट ५१ हजार १२०, मारवाडी महिला मञ्चको तर्फबाट ३१ हजार, वागेश्वरी आमा समूहको तर्फबाट ३ हजार, वुद्धिसरादेवी चर्ती मगरबाट २५ हजार ५००, भारती जोशीबाट २५ हजार ५१५, डा. खिमानन्द जोशीबाट २५ हजार ५११, विमला गौतमबाट २५ हजार रुपैयाँ तथा डा. विश्वनाथ शर्माले २५ हजार ३३३ रुपैयाँ बैकुण्ठधाम निर्माणका लागि दान गरेका छन् ।

आध्यात्मिक महोत्सवका बीच आज भएको तुलादानबाट २६ हजार संकलन भएको संयोजक श्रेष्ठले बताए । उनका अनुसार बैकुण्ठधाम सरकारी निकाय समन्वय समितिका संयोजक गेबिन्दप्रसाद पाण्डेकी आमा जुम्ला तातोपानी ४ की रक्षादेवी पाण्डे र नेपालगञ्ज ९ बाँकेगाउँकी सासुआमा विद्यादेवी पन्तको संयुक्त तुलादानबाट २६ हजार प्रदान भएको छ ।

सिधनियाघाटमा दाहसँस्कार गर्ने घाटसहितको संरचना निर्माण गर्ने उद्देश्यका साथ आध्यात्मिक महोत्सव सुरु भएको हो । आध्यात्मिक महोत्सव कार्तिक ३० गतेसम्म सञ्चालन हुनेछ । महोत्सव सञ्चालनका क्रममा हरेक दिन दाताहरुबाट प्राप्त भएको दानलाई सार्वजनिक गरिने मूल समितिका कोषाध्यक्ष श्रेष्ठले बताए । उनले वैकुण्ठधाम निर्माणका लागि दान गर्न चाहनेहरुका लागि महोत्सवस्थलमा क्युआर, नगदी रसिद र बैंक खाता उपलब्ध गराइएको बताए ।

प्रकाशित मिति: मंगलबार, कात्तिक २७, २०८१ २०:१६

प्रतिक्रिया दिनुहोस्