राप्तीको डुबान र कटानको समस्या समाधान गर्न प्रदेश सरकारले ध्यान दिने

समाचार

गृहपृष्ठ
समाचार
राप्तीको डुबान र कटानको समस्या समाधान गर्न प्रदेश सरकारले ध्यान दिने

राप्तीको डुबान र कटानको समस्या समाधान गर्न प्रदेश सरकारले ध्यान दिने

बुधबार, मंसिर ५, २०८१ बागेश्वरी पोस्ट

नेपालगन्ज । राप्ती नदीमा आउने बाढीका कारण डुबान र कटानको समस्या समाधान गर्न प्रदेश सरकारले ध्यान दिने भएको छ ।

लुम्बिनी प्रदेशका मुख्यमन्त्री चेतनारायण आचार्य आज राप्ती नदीले कटान गरेको स्थलहरुको अवलोकन गर्दै नागरिकहरुले भोग्दै आएको डुबान र कटानको समस्या समाधान गर्ने गरी अल्पकालीन र दिर्घकालीन समाधानका योजनाहरु अघि सारिने बताएका छन् । राप्तीसोनारी गाउँपालिका–७ खल्लाझगडियामा डुबान र कटानको समस्या बढ्दा मानव वस्ती उच्च जोखिममा परेको छ । स्थलगत अवलोकन गर्दै मुख्यमन्त्री आचार्यले डुबान र कटानको उच्च जोखिम रहेका स्थलहरुको पहिचान गरेर तटबन्धको योजना सञ्चालन गर्ने प्रतिबद्धता जनाए ।

‘राप्ती नदीमा आउने बाढी र त्यसले पु¥याउने जोखिम न्यूनीकरण गर्न अल्पकालीन र दिर्घकालीन योजना अघि बढाउनुपर्छ । यसमा प्रदेश सरकारले पहल लिन्छ,’ मुख्यमन्त्री आचार्यले भने, ‘जहाँ जोखिम छ, त्यहाँ तटबन्धको आयोजनाको काम अघि बढाउन जरुरी छ ।’

राप्ती नदीमा आउने बाढीका कारण बाँकेका नदि तटीय क्षेत्र सधैं डुबानमा पर्ने गरेका छन् । स्थानीयहरु विस्थापित हुने र खेतियोग्य जमिन बगरमा परिणत हुँदा समस्या बढ्दै गएको छ । नरैनापुर गाउँपालिका डुबान र कटानका कारण पूर्ण प्रभावित हुँदै आएको छ भने राप्तीसोनारी गाउँपालिका वडा नं. ७ को ७५ प्रतिशत भूभाग प्रभावित हुँदै आएको स्थानीय पूर्णबहादुर चौधरीले बताए । ‘राप्ती नदीले कटान तीब्र पार्दा हाम्रो उठिवास हुने अवस्था आयो । सरकारले समयमा तटबन्ध नगरे हामी विस्थापित हुने जोखिम छ, ’उनले भने,‘समस्या समाधान गर्ने गरी कार्यक्रम चले राम्रो हुन्थ्यो ।’

राप्ती नदी तटबन्धका लागि संघीय सरकारले जनताको तटबन्ध कार्यक्रम गर्दै आएको छ । तर, यो कार्यक्रमबाट तटबन्ध सञ्चालन गर्न बजेट अभाव हुँदा स्थानीयहरु नदी कटान र डुबानको जोखिममा बस्नुपर्ने बाध्यता छ । जोखिम क्षेत्रको अवलोकन गर्न मुख्यमन्त्री आचार्यसहित प्रतिनिधि सभा सदस्य, प्रदेश सभा सदस्य, स्थानीय तहका जनप्रतिनिधि, राजनीतिक दलका प्रतिनिधिहरुले स्थानीय बासिन्दासंग छलफल समेत गरेका थिए ।

प्रकाशित मिति: बुधबार, मंसिर ५, २०८१ १४:४८

प्रतिक्रिया दिनुहोस्