गच्छदारसहित ७४ जनाविरुद्द १५ दिने म्याद जारी

राजनीति

गृहपृष्ठ
राजनीति
गच्छदारसहित ७४ जनाविरुद्द १५ दिने म्याद जारी

गच्छदारसहित ७४ जनाविरुद्द १५ दिने म्याद जारी

शुक्रबार, फागुन २३, २०७६ बागेश्वरी पोस्ट

काठमाडौँ । विशेष अदालत काठमाडौंले अख्तियार दुरुपयोग अनुसन्धान आयोगले आरोपपत्र दायर गरेका मध्ये ७४ जनालाई अदालतमा उपस्थित हुन १५ दिने म्याद जारी गरेको छ ।

ललिता निवासको जग्गा प्रकरणमा अदालतले शुक्रबार कांग्रेस उपसभापति तथा तत्कालीन मन्त्री विजयकुमार गच्छदारसहित ७४ जनाको नाममा १५ दिने म्याद जारी गरेको अदालतका उपरजिष्ट्रार प्रवक्ता पुष्पराज पाण्डेले जानकारी दिए ।

अख्तियारलेगच्छदारविरुद्ध नौ करोड ६५ लाख ७६ हजार रुपैयाँ बिगो माग दाबीसहित ८ देखि १० वर्षसम्म कैद सजाय पनि माग दाबी गरिएको छ । अदालतले अख्तियारले आरोपपत्र दायर गर्दा क्रम संख्या १ देखि ४५ सम्मका व्यक्तिलाई र क्रम संख्या ११० देखि १४० सम्मका व्यक्तिलाई म्याद जारी गरेको छ । ती मध्ये ४४ जना भ्रष्टाचार आरोप लागेका र ३० जना जग्गा जफत प्रयोजनमा अभियोग लगाइएका छन् ।

म्याद जारी गरिएकामा अख्तियारले ललिता निवास प्रकरणमा प्रतिवादी बनाइएका पूर्वमन्त्रीद्वय डम्बर श्रेष्ठ, छविराज पन्त पनि छन् । पन्तलाई भौतिक योजना तथा पूर्वाधार मन्त्रालयका सचिवका रुपमा भ्रष्टाचार गरेको उल्लेख छ । त्यस्तै अख्तियारका पूर्वप्रमुख आयुक्त दीप बस्न्यातविरुद्ध पनि १५ दिने म्याद जारी गरेको छ । बस्न्यातलाई पनि भौतिक योजना तथा पूर्वाधार मन्त्रालयका सचिवका रुपमा भ्रष्टाचार गरेको उल्लेख छ ।

यस्तै, भूमिसुधार तथा व्यवस्था विभागका पूर्व निर्देशकत्रय पुष्पराज उपाध्याय, रुद्रकुमार श्रेठ र मुकुन्द आचार्य पनि छन् । त्यस्तै मालपोत कार्यालय डिल्लीबजारका पूर्वप्रमुखद्वय टीकाराम घिमिरे र कलाधर देउजाका नाममा पनि म्याद जारी भएको छ ।

जग्गा जफत प्रयोजनका लागि प्रतिवादी बनाइएका भाटभटेनीका सञ्चालक मीनबहादुर गुरुङका छोरा कल्याण, गैरआवासीय नेपाली संघ, कल्पना तुलाधरको नाममा पनि म्याद जारी छ ।

प्रकाशित मिति: शुक्रबार, फागुन २३, २०७६ १७:१८

प्रतिक्रिया दिनुहोस्