सामाजिक सद्भावसम्बन्धि तालिम समापन

समाचार

गृहपृष्ठ
समाचार
सामाजिक सद्भावसम्बन्धि तालिम समापन

सामाजिक सद्भावसम्बन्धि तालिम समापन

शनिबार, पुस ६, २०८१ बागेश्वरी पोस्ट

नेपालगञ्ज । अन्तर धार्मिक युवा समितिका पदाधिकारीहरुका लागि आयोजित तीन दिने क्षमता अभिबृद्धि तालिम सम्पन्न भएको छ । नाइस नेपालगञ्जले युएसएड नागरिक समाज र सञ्चार कार्यक्रमको सहकार्यमा सामाजिक सद्भावका लागि सँगै परियोजना अन्तरगत आयोजना गरेको तालिम आज सम्पन्न भएको हो ।

नेपालगञ्ज उपमहानगरपालिका र नरैनापुर गाउँपालिकामा रहेको अन्तर धार्मिक युवा समितिका २४ जना पदाधिकारीहरुको सहभागितामा सञ्चालित तालिममा सामाजिक सद्भाव, नेतृत्व विकास र समुदाय परिचालनका विभिन्न बिषयमा प्रशिक्षक नमस्कार शाह, हरिप्रसाद सुवेदी र आशिष बर्माले सहजीकरण गरेका थिए भने तालिममा सामाजिक सद्भावका लागि सम्बाद समूह बाँकेका संयोजक शुक्रऋषि चौलागाईले संवाद समूह बाँकेले गरिरहेका क्रियाकलाप र उपलब्धिका बारेमा अनुभव आदानप्रदान गरेका थिए ।

तालिमको अन्तिम दिन आज सहभागीहरुले पालिका स्तरीय कार्ययोजना तयार गरेका छन् । सामाजिक सद्भावका लागि युवाहरुको पहल, सहकार्य, समन्वयमा विभिन्न अभियान सञ्चालन गर्ने, सचेतनामूलक कार्यक्रम गर्ने तथा विभिन्न धार्मिक पर्बहरुको अवसरमा सद्भाव प्रबद्र्धनका लागि मिलन कार्यक्रम सञ्चालन गर्ने कार्ययोजनामा उल्लेख गरिएको छ ।

तालिमको समापनमा नाइस नेपालगञ्जका अध्यक्ष हेमराज भट्टले तीन दिनसम्म सञ्चालन भएको क्षमता अभिबृद्धि तालिमले युवा समितिका पदाधिकारीहरुको क्षमता अभिबृद्धिसँगै सामाजिक सद्भावका बिषयमा थप ज्ञान हासिल हुने विश्वास ब्यक्त गरे । उनले तालिमबाट सिकेको कुरालाई ब्यवहारमा लागू गर्न सबै सहभागीहरुलाई आग्रह गरे । समापनमा प्रतिक्रिया मन्तब्य राख्दै सहभागी अन्जना चतुर्बेदीले तालिमबाट धेरै नयाँ कुराको जानकारी हासिल भएको बताइन् । उनले तालिमबाट सिकेको कुरालाई समितिमार्फत सद्भाव प्रबद्र्धनमा लागू गर्ने प्रतिबद्धता गरिन् । यसैगरी अर्का सहभागी श्रीराम पालले तालिम निकै उपयोगी भएको र तालिमले आत्मविश्वास तथा काम गर्ने हौसला थपेको बताए ।

तालिममा द एसिया फाउण्डेसनका कार्यक्रम निर्देशक अजय दास, उपप्रमुख प्रिती थापा, द एसिया फाउण्डेसनका इन्द्र टमाटा, नाइसका अध्यक्ष भट्ट लगायत पदाधिकारीको उपस्थिति रहेको थियो । तालिमको समापन नाइसका परियोजना प्रबन्धक जोशिना थारुले गरेकी थिइन् । नाइसले नेपालगन्ज उपमहानगरपालिका र नरैनापुर गाउँपालिकामा सामाजिक सद्भावका लागि सँगै परियोजना सञ्चालन गरिरहेको छ ।

प्रकाशित मिति: शनिबार, पुस ६, २०८१ २१:५८

प्रतिक्रिया दिनुहोस्