मानव बेचबिखन रोकथामका लागि सबै पक्ष गम्भीर र संवेदनशिल बन्नुपर्नेमा जोड

समाचार

गृहपृष्ठ
समाचार
मानव बेचबिखन रोकथामका लागि सबै पक्ष गम्भीर र संवेदनशिल बन्नुपर्नेमा जोड

मानव बेचबिखन रोकथामका लागि सबै पक्ष गम्भीर र संवेदनशिल बन्नुपर्नेमा जोड

शुक्रबार, पुस १२, २०८१ बागेश्वरी पोस्ट

नेपालगञ्ज । मानव बेचबिखन रोकथामका लागि सबै पक्ष गम्भीर र संवेदनशिल बन्नुपर्नेमा जोड दिइएको छ ।

माइती नेपाल नेपालगञ्जद्वारा आज आयोजित 'मानव बेचबिखनविरुद्ध अन्तर सीमा कार्यशाला गोष्ठी' मा सहभागीहरुले सरकारी तथा गैरसरकारी निकायका बीचमा प्रभावकारी संयन्त्र बनाएर रोकथाम, उद्दार र पुनर्मिलनको काम गर्नुपर्नेमा जोड दिइएको छ ।

कार्यशालाको उद्घाटन गरेका प्रमुख अतिथि लुम्बिनी प्रदेशका सामाजिक विकास मन्त्री जन्मजय तिमिल्सिनाले तीन तहका सरकार गम्भीर भएर मानव बेचबिखन रोकथाममा प्रभावकारी काम गर्नुपर्ने बताए । उनले सरकार, बेचविखन विरुद्ध क्रियाशील संघसंस्था र भारतीय अधिकारीहरुले समन्वय गरेर यस्तो आपराधिक कार्य विरुद्ध सहकार्य गर्नुपर्ने आवश्यकता औंल्याए । कार्यशालाको अध्यक्षता ग्रहण गरेका बाँकेका प्रमुख जिल्ला अधिकारी खगेन्द्रप्रसाद रिजालले मानव बेचबिखन रोकथामको मुद्दालाई दुई देशका सुरक्षा अधिकारीको बैठकमा पनि उठाउने गरेको र आफूहरुका बीचमा समन्वय भइरहेको बताए ।

माइती नेपालका निर्देशक विश्वराम खड्काले आर्थिक विपन्नता र अभावको फाइदा उठाउँदै बैदेशिक रोजगारीको प्रलोभनमा पारी मानव बेचबिखन भइरहेको बताए । उनले एक तथ्यांक प्रस्तुत गर्दै पछिल्लो २ वर्षमा ४० हजार ३ सय जना बेचबिखनमा परेको तथा २६ हजार ५ सयको नाकाबाट उद्दार गरिएको जानकारी समेत दिए । कार्यक्रममा मानव सेवा संस्थान गोरखपुरका मोहम्मद समुनले पनि प्रस्तुतिकरण गर्दै दुई देशका बीचमा संयन्त्र बन्दा काम गर्न सहज हुने बताए ।

कार्यक्रममा जिल्ला समन्वय समिति उपप्रमुख सीता कार्की, बाँके प्रहरी प्रमुख प्रहरी उपरीक्षक तुलबहादुर कार्की, राष्ट्रिय मानव अधिकार आयोग नेपालगञ्ज प्रमुख द्वारिका अधिकारी, नेपाल पत्रकार महासंघ लुम्बिनी प्रदेश अध्यक्ष शुक्रऋषि चौलागाई लगायतले मानव बेचविखनविरुद्ध सबैको सहकार्य र समन्वयमा जोड दिए । माइती नेपाल नेपालगञ्जका प्रमुख केशव कोइरालाले दुई देशका सरकारी तथा गैरसरकारी संघसंस्थाका अधिकारीले मानव बेचबिखन रोक्न प्रभावकारी संयन्त्र बनाउने र त्यसले समन्वय, सूचना आदान प्रदान, उद्दारमा काम गर्ने बताए । कार्यक्रममा मानव बेचबिखनविरुद्ध काम गर्ने संघसंस्थाका प्रतिनिधिको उपस्थिति थियो ।

प्रकाशित मिति: शुक्रबार, पुस १२, २०८१ १८:५५