४१औं जिल्ला स्तरीय जुनियर तथा युवा रेडक्रस गोष्ठी सम्पन्न

समाचार

गृहपृष्ठ
समाचार
४१औं जिल्ला स्तरीय जुनियर तथा युवा रेडक्रस गोष्ठी सम्पन्न

४१औं जिल्ला स्तरीय जुनियर तथा युवा रेडक्रस गोष्ठी सम्पन्न

बुधबार, पुस २४, २०८१ बागेश्वरी पोस्ट

नेपालगञ्ज । नेपाल रेडक्रस सोसाइटी बाँके जिल्ला शाखाको आयोजनामा ४१औं जिल्ला स्तरीय जुनियर तथा युवा रेडक्रस गोष्ठी सिधनवामा आज सम्पन्न भएको छ । गोष्ठीको उद्घाटन गर्दै राप्तीसोनारी गाउँपालिका अध्यक्ष तप्तबहादुर पौडेलले रेडक्रसको कार्यक्रममा आउँदा मानवताको उर्जा प्राप्त हुने गरेको बताउँदै विपद् हुनासाथ सबैले रेडक्रसलाई सम्झने गरेको उल्लेख गरे । उनले अहिले मानवता हराइरहेकोले बालबालिकाहरुलाई नैतिक शिक्षा दिन शिक्षकहरुलाई अनुरोध गर्दै पालिकास्तरको विपद् व्यवस्थापन सम्बन्धि योजना निर्माणमा बाँके रेडक्रसले सहयोग गरेको धारणा व्यक्त गरे ।

कार्यक्रममा बर्षभरी संचालन भएका प्रतियोगिताहरुका विजेताहरुलाई पुरस्कार वितरण गरिएको थियो । यसरी सम्पन्न भएका प्रतियोगिताहरुमा निबन्ध, कविता र चित्रकला रहेका थिए । उक्त प्रतियोगिताका विजेता प्रथमलाई १ हजार ५ सय, दोश्रोलाई १ हजार र तृतीयलाई ५ सय नगद पुरस्कार र प्रमाणपत्र तथा आतिथ्यता ग्रहण गर्ने विद्यालयलाई प्रशंसापत्र प्रदान गरिएको छ । युवा रेडक्रस सर्कल सिद्धेश्वर मावि सिधनवाको आतिथ्यतामा भएको कार्यक्रमको बन्दसत्रमा शैक्षिक सत्र २०८२ का लागि ४२औं जिल्ला स्तरीय जुनियर तथा युवा रेडक्रस गोष्ठी, प्रधानाध्यापक तथा शिक्षक नायक गोष्ठी, निबन्ध, कविता र चित्रकला प्रतियोगिता आयोजना गरिने योजना तर्जुमा भएको छ ।

उद्घाटन सत्र नेरेसो जुनियर तथा युवा रेडक्रस विकास समितिका संयोजक यमनारायण महतोको अध्यक्षतामा र बन्दसत्र जुरेस समिति सदस्य एवं युवा सर्कल सिद्धेश्वरका शिक्षक नायक दिर्घराज बजगाईको अध्यक्षतामा सम्पन्न भएको थियो भने कार्यक्रममा २८ वटा विद्यालय सर्कलका शिक्षक नायक, छात्र छात्रा र १४ वटा उपशाखाका प्रतिनिधिहरुको सहभागिता रहेको थियो ।

कार्यक्रममा राप्तीसोनारी गाउँपालिकाका अध्यक्ष पौडेल, वडा नम्बर ६ का वडा अध्यक्ष लबराज खरेल, नेरेसो बाँके शाखाका मन्त्री अजिज अहमद सिद्दिकी, कोषाध्यक्ष राकेशबहादुर श्रीवास्तव, उपकोषाध्यक्ष दुखीराम लोनिया, उपमन्त्री तेजबहादुर सुवेदी, सोनारी उपशाखा सभापति यज्ञनारायण शर्मा, शाखाका उपनिर्देशक दोलखबहादुर डाँगी, सिद्धेवर माविका प्रअ ओम प्रकाश पुन, नेरा मावि गुलरीका शिक्षक नायक पुष्पराज खड्का लगायतले विचार व्यक्त गरेका थिए भने कार्यक्रम संचालन सिद्धेश्वर माविका शिक्षक नारायणप्रसाद जैसीले गरेका थिए ।

प्रकाशित मिति: बुधबार, पुस २४, २०८१ १९:३९

प्रतिक्रिया दिनुहोस्