नेपालगञ्जको जामा मस्जिदमा करोडौंको घोटाला !

समाचार

गृहपृष्ठ
समाचार
नेपालगञ्जको जामा मस्जिदमा करोडौंको घोटाला !

नेपालगञ्जको जामा मस्जिदमा करोडौंको घोटाला !

सोमबार, माघ ७, २०८१ बागेश्वरी पोस्ट

नेपालगञ्ज । नेपालगञ्जमा रहेको दारुल उलुम फैजुन्नवी जामा मस्जिद ईदगाह संचालक समितिको आन्तरिक विवाद जिल्ला प्रशासन कार्यालय बाँके हुँदै गृह मन्त्रालयसम्म पुगेको छ । आठ बर्षदेखि लेखा परिक्षण र नविकरण नगरी करोडौं रकम अपचलन गरेको र विगत ७ महिनादेखि निर्वाचन गराउने भनेर जिल्ला प्रशासन कार्यलयले गठन गरेको तदर्थ समितिले समेत साधारणसभा गराउन नसकेपछि तदर्थ समितिले नै निर्वाचन गराउन भनी ५ सदस्यीय निर्वाचन समिति गठन गरेको थियो तर उक्त समितिले समेत निर्वाचन प्रक्रियामा नगएर तेस्रो साधारण सभा गरेर १९२७ जना सदस्य रहेको जामा मस्जिदमा १ सय ५१ जनाको उपस्थिति गराई अबैधानिक तरिकाले मूल समिति नै गठन गरेपछि साधारण सदस्यहरुले निर्वाचनको माग गर्दै आज प्रमुख जिल्ला अधिकारीलाई ज्ञापन बुझाएका छन् ।

ज्ञापनपत्र बुझाउँदै साधारण सदस्यहरुले निर्वाचन गराउने भनी गठन भएको निर्वाचन समितिका संयोजक सलिम हल्वाई (बाबु नेता) ले आफ्नो घरमा बसेर मूल समिति गठन गर्दै आफैं मूल समितिको कोषाध्यक्ष बनेपछि संयोजक हल्वाईको कर्तुत सार्वजानिक भएको बताए । प्रमुख जिल्ला अधिकारी खगेन्द्र प्रसाद रिजाललाई ज्ञापनपत्र बुझाउँदै मुस्लिमहरुले २४ घण्टाभित्रै अबैधानिकरुपमा गठन भएको समितिलाई खारेज गरेर निर्वाचन घोषणा नगरिए चरणबद्ध आन्दोलन गर्न बाध्य हुने चेतावनी दिएका छन् ।

प्रजिअ रिजालले ज्ञापनपत्र बुझ्दै मुस्लिमहरुले उठाएको मागप्रति आफू गम्भीर रहेको बताउँदै जामा मस्जिदको विवादका विषयमा छानविन सुरु गरिएको बताए । उनले ८ बर्षसम्म संस्था नविकरण र लेखा परिक्षण समेत नगरी पश्चिम नेपालको सबैभन्दा ठूलो धार्मिक संस्थामा कसरी आर्थिक कारोबार हुन सक्यो ? कस-कसले कुन प्रयोजनका लागि उक्त संस्थामा पैसा दिए लगायतका विषयमा छानविन सुरु गरिएको बताउँदै उनले संस्था नविकरण नभएसम्म कुनै व्यक्तिले गठन गरेको समितिलाई बैधानिकता दिन नमिल्ने बताए । प्रजिअ रिजालले समाजभित्रै द्वन्द गराउन मनोपरी तरिकाले समिति गठन गरेको प्रमाणित भए निर्वाचन समितिलाई हदैसम्म कारवाही गर्ने बताए ।

मुस्लिमहरुले आजै नेपालगञ्ज उपमहानगरपालिकाका मेयर प्रशान्त विष्टलाई समेत भेटेर ज्ञापनपत्र बुझाएका छन् । मेयर विष्टले निर्वाचन गराउन नगरपालिकाले पहल गर्ने बताउँदै मस्जिदलाई अनिर्णयको बन्दी बनाउन खोज्नु चिन्ताको विषय भएको भन्दै निर्वाचन गराउन आफूले पहल गर्ने प्रतिबद्धता व्यक्त गरेका थिए । मुस्लिमहरुले आजै गृह मन्त्रालय र मुस्लिम आयोगलाई समेत इमेलमार्फत ज्ञापन पत्र पठाएका छन् ।