नेपालगञ्जमा ५० जनाको सहभागितामा अलुम्नाई मिटअप

समाचार

गृहपृष्ठ
समाचार
नेपालगञ्जमा ५० जनाको सहभागितामा अलुम्नाई मिटअप

नेपालगञ्जमा ५० जनाको सहभागितामा अलुम्नाई मिटअप

सोमबार, माघ ७, २०८१ बागेश्वरी पोस्ट

नेपालगञ्ज । बालिका शिक्षा कार्यक्रम अन्तर्गत नेपालगञ्जमा अलुम्नाई मिटअप कार्यक्रम भएको छ । बास नेपालले रुम टु रिडको आर्थिक तथा प्राविधिक सहयोगमा आयोजना गरेको उक्त कार्यक्रममा कक्षा १२ पास अर्थात (अलुम्नाई) बालिकाहरूलाई एकै ठाउँमा भेला गराएर मिटअप गरिएको हो ।

अलुम्नाईहरुका लागि हरेक वर्ष आयोजना गर्दै आएको मिटअप कार्यक्रमले बालिकाहरूको प्रगतिबारे जानकारी लिने, सफलताका कथा आदानप्रदान गर्ने तथा आपसी सम्बन्धलाई सुदृढ गर्ने उद्देश्य राखेको थियो । खजुरा गाउँपालिकाको ज्ञानोदय नमुना माबि र कोहलपुर नगरपालिकाको राम माबिमार्फत बालिका शिक्षा कार्यक्रमबाट कक्षा १२ उत्तीर्ण गरेर क्याम्पस तथा विभिन्न क्षेत्रमा सक्रिय बालिकाहरूको सहभागितामा कार्यक्रम सम्पन्न भएको हो ।

कार्यक्रमको उद्घाटनमा स्वागत गर्दै बास नेपालका केन्द्रीय उपाध्यक्ष शिब कुमार बर्माले कक्षा १२ पास गरेर विभिन्न क्षेत्रमा क्रियाशिल बालिकाहरुलाई एकै ठाँउमा सहभागी भएर अनुभव आदानप्रदान र प्रतिभा शो गरेको देख्दा खुसी लागेको बताए । कार्यक्रममा रुम टु रिडका बरिष्ठ फिल्ड कार्यक्रम प्रबन्धक खड्ग बहादुर कुँवरले बालिकाहरुलाई पढाई निरन्तरता दिँदै ब्यक्तिगत र सामाजिकरुपमा सकारात्मक कार्य गर्न अनुरोध गरेका थिए । उनले अलुम्नाई व्यक्तित्वहरूको कथा सुन्दा गर्व महसुस भएको बताए ।

कार्यक्रममा क्यारियर काउन्सिलिङ र उत्प्रेरणाका विषयमा रुम टु रिडका कार्यक्रम अधिकृत निरोज कोइरालाले प्रस्तुति गरेका थिए भने अल्मुनाई नेटवर्क फरमेसन कार्यक्रम संयोजक हेमराज भट्टले गरेका थिए । बास नेपालका वरिष्ठ सामाजिक परिचालक जमुना चौधरीले सहजीकरण गरेको कार्यक्रममा सहभागी बालिकाहरू सन्ध्या थापा मगर, प्रकृति भण्डारी, लक्ष्मी पुन मगर, रहमतुल खाँले आफ्नो अनुभव र प्रेरणाका कथा सुनाएका थिए । उनीहरुले बालिका शिक्षा कार्यक्रमले आफ्नो जीवनमा ल्याएको सकारात्मक परिवर्तनबारे बताएका थिए । उनीहरूले जीवन जिउने कला, बोल्ने सीप, निर्णय क्षमताको विकास र समस्या समाधान गर्न सिकेको अनुभव सुनाएका थिए । कार्यक्रममा अल्मुनाईहरूको प्रतिभा उजागर गर्न ट्यालेन्ट शो पनि गरिएको थियो ।

कार्यक्रममा बासका बरिष्ठ सामाजिक परिचालक मेघा राना, रचना चौधरी, चन्द्रा बुढा, शोभा थापा मगर, लेखा अधिकृत हंस शाही र ५० जना अल्मुनाईहरूको सक्रिय सहभागिता रहेको थियो ।

प्रकाशित मिति: सोमबार, माघ ७, २०८१ २१:३३