सातौं संस्करणको टुर डे ठाकुरद्वारा सुरु, मन्त्री न्यौपानेले गरे उद्घाटन

समाचार

गृहपृष्ठ
समाचार
सातौं संस्करणको टुर डे ठाकुरद्वारा सुरु, मन्त्री न्यौपानेले गरे उद्घाटन

सातौं संस्करणको टुर डे ठाकुरद्वारा सुरु, मन्त्री न्यौपानेले गरे उद्घाटन

शुक्रबार, माघ २५, २०८१ बागेश्वरी पोस्ट

नेपालगन्ज । बाँके-बर्दियाको पर्यटन प्रवर्द्धन तथा साइकल संस्कृतिको विकास गर्न सातौं संस्करणको टुर डे ठाकुरद्वारा सुरु भएको छ । नेपालगन्ज साइक्लिङ क्लबको आयोजनामा सुरु भएको दुई दिने इभेन्टको आज विहान लुम्बिनी प्रदेशका उद्योग, पर्यटन तथा यातायात मन्त्री प्रचण्ड विक्रम न्यौपानेले उद्घाटन गरे ।

इभेन्ट उद्घाटन गर्दै मन्त्री न्यौपानेले लुम्बिनी प्रदेशको पर्यटन प्रबर्द्धन गर्न टुर डे ठाकुरद्वारा सहयोगी सिद्ध हुने विश्वास व्यक्त गरे । उनले यो इभेन्टलाई मुगुको रारा तालसम्म एड्भेन्चरल साइकल टुरका रुपमा अगाडि बढाउने प्रतिबद्धता भए आगामी बर्ष प्रदेश सरकारका तर्फबाट बजेट छुट्ट्याउने घोषणा समेत गरे । उनले यसले लुम्बिनी र कर्णालीलाई पर्या-पर्यटनसंग जोड्न सहयोग पुग्ने बताए । मन्त्री न्यौपानेले स्वस्थ वातावरण र स्वस्थ शरीरका लागि पनि साइकल संस्कृति जरुरी रहेको भन्दै नेपालका सडकहरु साइकलमैत्री बनाउन आवश्यक देखिएको बताए ।

May be an image of 6 people and text

नेपालगन्ज साइक्लिङ क्लबका अध्यक्ष प्रदिप सापकोटाको अध्यक्षतामा भएको उद्घाटन कार्यक्रममा संघीय सांसद डा. धवल शमशेर राणा, नेपालगन्ज उपमहानगरपालिकाका उपमेयर कमरुद्दिन राईले पर्यटन प्रवर्द्धन र साइकल संस्कृतिको विकास गर्न टुर डे ठाकुरद्वारा सार्थक बनिरहेको बताए । राणाले टुर डे ठाकुरद्वारालाई अझ फराकिलो बनाउँदै रारासम्म विस्तार गर्नुपर्ने आवश्यकता औंल्याए । क्लबका बरिष्ठ उपाध्यक्ष एवम् एभेन्ट संयोजक सुरेन्द्र दीप कार्कीले स्वागत मन्तव्य ब्यक्त गरेको उद्घाटन समारोहको संचालन सचिव इन्द्र गिरीले गरेका थिए । मन्त्री प्रचण्डबिक्रम न्याैपाने, सांसद एवं राप्रपाका महामन्त्री डा. धवलशमशेर राणा, नेपालगन्ज उपमहानगरपालिकाका उपमेयर कमरुद्दिन राईले साइकल चलाएर टुर दि ठाकुरद्वाराकाे उद्घाटन गरे । साइकल यात्रामा देश-विदेशका गरी २०० जना महिला र पुरुष साइकल यात्री सहभागी छन् । त्यस मध्ये भारतबाट २९ र चीनबाट १ जना साइकल यात्री पनि सहभागी छन् ।

May be an image of 7 people and text

नेपालगन्जको बागेश्वरी मन्दिर परिसरबाट साइकल यात्रा सुरु भएको छ । साइकल यात्रा बागेश्वरी मन्दिर परिसरबाट सुरु भई त्रिभुवन चोक, वीपी चोक, सुर्खेतरोड हुँदै कोहलपुर, केदारेश्वर धाम, सतखलुवा सिमसार क्षेत्र हुँदै बाटोमा रहेका विभिन्न धार्मिक पर्यटकीय स्थल र पर्यटकीय क्षेत्रको भ्रमण गर्दै ठाकुरद्वारा मन्दिर पुग्ने कार्यक्रम छ । बागेश्वरी मन्दिरदेखि ठाकुरबाबा मन्दिरसम्मको दुरी करीब १०० किलोमिटर छ । सातौं संस्करणको टुर डे ठाकुरद्वारा इभेन्टका लागि २७ लाख रुपैयाँ खर्च हुने अनुमान आयोजक नेपालगन्ज साइक्लिङ क्लबले जनाएको छ । विश्वकै चर्चित इभी मोटर BYD मुख्य प्रायोजकको रुपमा छ ।