अख्तियार नेपालगन्ज कार्यालयले मनायो ३४औं स्थापना दिवस

समाचार

गृहपृष्ठ
समाचार
अख्तियार नेपालगन्ज कार्यालयले मनायो ३४औं स्थापना दिवस

अख्तियार नेपालगन्ज कार्यालयले मनायो ३४औं स्थापना दिवस

पाण्डे र मौर्यलाई 'अख्तियार अनुसन्धान सेवा पुरस्कार

सोमबार, माघ २८, २०८१ बागेश्वरी पोस्ट

नेपालगञ्ज । अख्तियार दुरुपयोग अनुसन्धान आयोगको कार्यालय बुटवल, सम्पर्क कार्यालय नेपालगञ्जले चालू आर्थिक बर्षमा ६२ प्रतिशत प्रगति गरेको छ । अख्तियार दुरुपयोग अनुसन्धान आयोगको ३४औं स्थापना दिवसको अवसरमा आज नेपालगञ्जमा आयोजित कार्यक्रममा सम्पर्क कार्यालय नेपालगञ्जका प्रमुख गणेश बहादुर अधिकारीले उजुरी फछ्र्यौटमा साउनदेखि हालसम्म ६२ प्रतिशत प्रगति हासिल गरेको बताए ।

गत बर्ष ८३.८३ प्रतिशत प्रगति हासिल भएको अधिकारीले जानकारी दिए । नेपालगञ्ज कार्यालयको कार्य क्षेत्र लुम्बिनीका बाँके, बर्दिया, दाङ र रोल्पा जिल्ला हुन् । चालू आर्थिक बर्ष २०८१/८२ मा सम्पर्क कार्यालय नेपालगञ्जमा २७९ वटा उजुरी दर्ता भएका छन् । साउनमा ७१, भदौमा ४१, असोज ३१, कार्तिक २८, मंसिर ३७, पुसमा ४० र माघ महिनामा ३१ उजुरी दर्ता भएका छन् ।

कार्यालय प्रमुख अधिकारीको सभापतित्व एवम् लुम्बिनी प्रदेशका आन्तरिक मामिला तथा कानुन मन्त्री आदेश कुमार अग्रवालको प्रमुख आतिथ्यतामा सम्पन्न कार्यक्रममा बाँकेका स्थानीय पालिका प्रमुखलाई बार्षिक प्रतिवेदन हस्तान्तरण गरिएको थियो । कार्यक्रममा अधिकारीले हालसम्मको कार्य सम्पादन अवस्थाका बारेमा जानकारी गराएका थिए । त्यस अवसरमा 'अख्तियार अनुसन्धान सेवा पुरस्कार' बाट दुई जना कर्मचारीलाई पनि पुरस्कृत गरिएको छ । प्रमुख अतिथि अग्रवालले इन्जिनियर नवीन पाण्डे र प्रहरी हवल्दार गुलाब चन्द्र मौर्यलाई पुरस्कृत गरेका थिए । कार्यक्रममा स्थापना दिवसको अवसरमा आयोजित विभिन्न खेलकुद प्रतियोगिताका विजेतालाई शिल्ड र प्रमाणपत्र समेत वितरण गरिएको थियो ।

कार्यक्रममा बोल्दै मन्त्री अग्रवालले भ्रष्टाचारलाई सामाजिक रोगको संज्ञा दिँदै भ्रष्टाचारीलाई सामाजिक बहिष्कार गर्नुपर्ने बताए । उनले भ्रष्टाचार नियन्त्रणका लागि शून्य सहनशिलताका साथ अघि बढ्नुपर्नेमा जोड दिए । सुशासन प्रबद्र्धनका लागि सबै इमान्दार र गम्भीर बन्नुपर्ने मन्त्री अग्रवालको भनाई छ ।

कार्यक्रममा जिल्ला समन्वय समिति प्रमुख ज्ञानेन्द्र कुमार चौधरी, नेपालगञ्ज उपमहानगरपालिकाका प्रमुख प्रशान्त विष्ट, बैजनाथ गाउँपालिका अध्यक्ष प्रकाश बहादुर शाही, प्रमुख जिल्ला अधिकारी खगेन्द्र प्रसाद रिजाल, नेपालगञ्ज उपमहानगरपालिकाका प्रमुख प्रशासकीय अधिकृत ओम बहादुर खड्का, नेपाल पत्रकार महासंघ बाँकेका अध्यक्ष नवीन गिरीले शुभकामना मन्तब्य ब्यक्त गर्दै सदाचार र सुशासन प्रबद्र्धनका लागि सबै प्रतिबद्ध भए मात्र भ्रष्टाचार नियन्त्रण गर्न सकिनेमा जोड दिएका थिए । बक्ताहरुले आगामी दिनमा आयोगले भ्रष्टाचार नियन्त्रण र सुशासन प्रवर्द्धनमा अझै प्रभावकारी ढंगले काम गर्ने विश्वास व्यक्त गरेका थिए ।

कार्यक्रममा डुडुवा गाउँपालिका अध्यक्ष नरेन्द्र कुमार चौधरी, राप्तीसोनारीका अध्यक्ष तप्त बहादुर पौडेल, नरैनापुरका अध्यक्ष इश्तियाक अहमद शाह, विभिन्न सरकारी कार्यालयका प्रमुख, पालिकाका प्रमुख प्रशासकीय अधिकृतहरु, पत्रकार लगायत उपस्थित थिए । "भ्रष्टाचार नियन्त्रणमा नागरिक साझेदारी, सुशासन प्रबद्र्धनमा सबैको जिम्मेवारी" भन्ने मूल नाराका साथ अख्तियार दुरुपयोग अनुसन्धान आयोगको ३४औं स्थापना दिवस मनाइएको छ ।

प्रकाशित मिति: सोमबार, माघ २८, २०८१ १५:१९