बाँकेमा सात दिनमा ८० प्रतिशत किशोरीलाई 'एचपीभी' खोप

स्वास्थ्य

गृहपृष्ठ
स्वास्थ्य
बाँकेमा सात दिनमा ८० प्रतिशत किशोरीलाई 'एचपीभी' खोप

बाँकेमा सात दिनमा ८० प्रतिशत किशोरीलाई 'एचपीभी' खोप

सोमबार, माघ २८, २०८१ बागेश्वरी पोस्ट

नेपालगञ्ज । पाठेघरको मुखको क्यान्सर विरुद्धको एचपीभी खोप अभियान सुरु भएको सात दिनमा बाँके जिल्लामा ८० प्रतिशत किशोरीलाई खोप लगाइसकिएको छ ।

स्वास्थ्य कार्यालय बाँकेका खोप फोकल पर्सन नरेश श्रेष्ठका अनुसार जिल्लाका चार वटा पालिकामा सुरु गरिएको पहिलो चरणको खोप कार्यक्रम अन्तर्गत नेपालगञ्ज, कोहलपुर, खजुरा र जानकीमा सात दिनमा १९ हजार ७ सय ८२ जना किशोरीलाई एचपीभी खोप लगाइएको छ ।

उहाँले ती चार पालिकामा लक्षित उमेर समूहका २४ हजार ५ सय ८९ किशोरीहरु मध्ये १९ हजार ७ सय ८२ जना अर्थात् ८० प्रतिशतलाई खोप लगाइसकिएको बताउनुभयो । नेपालगञ्ज उपमहानगरपालिकामा ७ हजार ५ सय १२ जना, कोहलपुरमा ५ हजार ८ सय ९६ जना, खजुरामा ४ हजार २ सय ४ जना र जानकीमा २ हजार १ सय ७० जना किशोरीलाई एचपीभी खोप लगाइएको छ ।

जिल्लाका करीब ३७ हजार किशोरीलाई एचपीभी खोप लगाउने लक्ष्यका साथ माघ २२ गतेबाट खोप अभियान सुरु गरिएको थियो । फागुन ६ गतेसम्म सञ्चालन गरिने सो अभियान अन्तर्गत जिल्लामा कक्षा ६ देखि १० सम्म र विद्यालय बाहिरका १० देखि १४ वर्ष उमेरका किशोरीहरुलाई उक्त खोप लगाइने स्वास्थ्य कार्यालय बाँकेले जनाएको छ ।

प्रकाशित मिति: सोमबार, माघ २८, २०८१ २१:३५

प्रतिक्रिया दिनुहोस्