बाँकेमा दोस्रो चरणमा एचपीभी खोप अभियान सुरु

स्वास्थ्य

गृहपृष्ठ
स्वास्थ्य
बाँकेमा दोस्रो चरणमा एचपीभी खोप अभियान सुरु

बाँकेमा दोस्रो चरणमा एचपीभी खोप अभियान सुरु

बुधबार, माघ ३०, २०८१ बागेश्वरी पोस्ट

नेपालगञ्ज । बाँकेमा आजदेखि दोस्रो चरणमा एचपीभी खोप अभियान सुरु भएको छ । राप्तीसोनारी गाउँपालिका, डुडुवा गाउँपालिका नरैनापुर गाउँपालिका र बैजनाथ गाउँपालिकामा मुखको क्यान्सर विरुद्धको एचपीभी खोप अभियान सुरु गरिएको स्वास्थ्य कार्यालय बाँकेका खोप फोकलपर्सन नरेश श्रेष्ठले जानकारी दिए । राप्तीसोनारीमा शिवशक्ति माध्यमिक विद्यालयबाट अभियान सुरु भएको राप्तीसोनारी गाउँपालिकाका स्वास्थ्य शाखा प्रमुख देवेन्द्र केसीले जानकारी दिए ।

अभियानको सुभारम्भ गर्दै प्रदेश सभा सदस्यहरुले महिलाहरुलाई पाठेघरको मुखको क्यान्सरबाट जोगाउन खोप महत्वपूर्ण भएको बताए । प्रदेशसभा सदस्य एवम् पूर्व मन्त्री कृष्णा केसी नमुनाले महिलाहरु पाठेघरको मुखको क्यान्सर जस्तो रोगबाट मृत्युवरण गर्नुपर्ने अवस्था रहेकाले त्यसबाट बच्न अहिले नै खोप लगाउन उपयुक्त भएको बताइन् । विभिन्न तथ्यांकहरुले नेपालमा पाठेघरको मुखको क्यान्सरबाट दैनिक चार जना महिलाको ज्यान जाने गरेको उल्लेख छ ।

क्यान्सर भयावह रोग भए पनि आवश्यक सावधानी र चेकजाँच गरे धेरै क्यान्सरहरु मध्ये पाठेघरको मुखको क्यान्सरबाट महिलालाई जोगाउन सकिने केसीको भनाई छ । अर्का प्रदेश सभा सदस्य एवम् पूर्व मन्त्री दुर्गा प्रसाद चौधरीले पनि नेपाल सरकारको ठूलो लगानी रहेको यो अभियानलाई सफल बनाउन लक्षित समूहले खोप लगाउन आवश्यक रहेको बताए । बालिका र किशोरीहरुले ढुक्क भएर खोप लगाई सरकारको अभियानमा सहयोग गर्न आग्रह गरे ।

यसैगरी प्रदेश सभा सदस्य सञ्जु कुमारी थारुले पनि पाठेघरको मुखको क्यान्सरबाट हुन सक्ने जोखिम कम गर्न खोप उपयुक्त विकल्प हुने बताइन् । उनले सबै बालिका र किशोरीलाई खोप लगाउन पनि आग्रह गरिन् । राप्तीसोनारी गाउँपालिकाका अध्यक्ष तप्त बहादुर पौडेलले पनि खोप अभियानमा सहयोग गर्न पालिकाबासीलाई आग्रह गरे ।

स्वास्थ्य कार्यालय बाँकेका प्रमुख अंगद बहादुर शाहीले दोस्रो चरणको अभियान सुरु भएको बताए । बाँकेमा दुई चरणमा एचपीभी खोप अभियान भइरहेको जानकारी दिए । कार्यक्रममा गाउँपालिकाका उपाध्यक्ष मनिषा सिंह थारु, वडा अध्यक्ष शालिकराम डाँगी लगायतले पनि आ-आफ्नो धारणा राखेका थिए ।

प्रकाशित मिति: बुधबार, माघ ३०, २०८१ १८:४०