स्थानीय विज्ञापन स्थानीय सञ्चार माध्यमलाई नै उपलब्ध गराउन आग्रह

समाचार

गृहपृष्ठ
समाचार
स्थानीय विज्ञापन स्थानीय सञ्चार माध्यमलाई नै उपलब्ध गराउन आग्रह

स्थानीय विज्ञापन स्थानीय सञ्चार माध्यमलाई नै उपलब्ध गराउन आग्रह

सचिवलाई सूचना अधिकारीको जिम्मेवारी

आइतबार, चैत १०, २०८१ बागेश्वरी पोस्ट

नेपालगन्ज । नेपाल पत्रकार महासंघ बाँके शाखाले स्थानीय विज्ञापन स्थानीय सञ्चार माध्यमलाई नै उपलब्ध गराउन आग्रह गरेको छ । शाखा अध्यक्ष नवीन गिरीको अध्यक्षतामा बसेको कार्यसमिति बैठकले पछिल्लो केही वर्षयता सञ्चार माध्यमको चुलिँदै गएको आर्थिक संकटलाई मध्यनजर गर्दै स्थानीय सञ्चार माध्यमहरूको प्रवलीकरणको लागि समानुपातिक विज्ञापन नीति लागू गर्दै स्थानीय विज्ञापन तथा लोककल्याणकारी सूचनाहरू स्थानीय सञ्चार माध्यमलाई उपलब्ध गराउने ‘प्रोत्साहन नीति’ अवम्लबन गर्न सम्बद्ध सबै सरोकारवालालाई आग्रह गर्ने निर्णय गरेको हो ।

साथै महासंघ बाँके शाखाले स्थानीय सबै सञ्चार माध्यमलाई श्रमजीवि पत्रकार ऐन कार्यान्वयन गर्न तथा ऐन बमोजिम नियुक्ति पत्र, सेवा सुविधा र नियमित रूपमा पारिश्रमिक उपलब्ध गराउन ध्यानाकर्षण गराउने निर्णय पनि गरेको छ । बैठकले नेपाल पत्रकार महासंघ बाँके शाखाको सूचना अधिकारी महासंघ बाँकेका सचिव कृष्ण ओलीलाई तोक्ने तथा बाँके शाखाको वेबसाइट निर्माण गर्ने निर्णय गरेको थियो ।

यसैगरी नेपाली नयाँ वर्ष २०८२ सालको अवसरमा भित्ते–पात्रो (क्यालेण्डर) प्रकाशन गर्ने निर्णय गरिएको सचिव कृष्ण ओलीले बताए । त्यसका लागि शाखा उपाध्यक्ष करुणा शाहको संयोजकत्वमा सचिव ओली, कोषाध्यक्ष सुनिल रेग्मी तथा सदस्यहरू कृष्णराज अधिकारी, पहल बहादुर केसी, आशा परियार र सलामत अली शेष रहने गरी सात सदस्यीय ‘भित्ते–पात्रो प्रकाशन समिति’ गठन गरिएको छ ।

बैठकपछि शाखा सचिव ओलीद्वारा जारी प्रेस विज्ञप्तीमा ‘पत्रकार उपचार कोष’ र ‘पत्रकार कल्याण कोष’ खडा गर्ने निर्णय गरिएको उल्लेख छ । त्यसका लागि नेपाल पत्रकार महासंघ बाँके शाखाको नेपालगन्जस्थित एभरेष्ट बैंकमा रहेको चालू खाता नम्बर ०१९००१०५२००२१६ मा अघिल्लो कार्यसमितिले बुझाएको हिसाब; बैंक स्टेटमेन्ट अनुसार ४,०४,४५०.२५ रूपैयाँ मौज्दात रहेको र उक्त रकम ‘पत्रकार उपचार कोष’ र ‘पत्रकार कल्याण कोष’ मा रूपान्तरण गर्ने निर्णय गरिएको छ । यस्तै अघिल्लो कार्यसमितिको पालामा उठ्नुपर्ने बाँकी बक्यौता रकम उठाएर ती कोषमा नै दाखिला गर्ने निर्णय समेत गरिएको विज्ञप्तीमा उल्लेख छ ।

May be an image of text