बासका नवनिर्वाचित केन्द्रीय पदाधिकारीलाई केन्द्रीय कार्यालयमा स्वागत तथा बधाई

समाचार

गृहपृष्ठ
समाचार
बासका नवनिर्वाचित केन्द्रीय पदाधिकारीलाई केन्द्रीय कार्यालयमा स्वागत तथा बधाई

बासका नवनिर्वाचित केन्द्रीय पदाधिकारीलाई केन्द्रीय कार्यालयमा स्वागत तथा बधाई

सोमबार, चैत २५, २०८१ बागेश्वरी पोस्ट

नेपालगञ्ज । बास नेपालले नवनिर्वाचित केन्द्रीय पदाधिकारीहरुलाई केन्द्रीय कार्यालयमा स्वागत तथा बधाई ज्ञापन गरेको छ । बास नेपालको चैत्र २२ र २३ गते नेपालगञ्जमा सम्पन्न १०औं महाधिबेशनबाट निर्वाचित केन्द्रीय कार्यसमितिलाई फूलमाला र अबिरले स्वागत तथा बधाई ज्ञापन गरेको हो । बासका निमित्त कार्यकारी निर्देशक हेमराज भट्टको अगुवाईमा बास केन्द्रीय कार्यालयमा कार्यरत कर्मचारीहरुले बासका नवनिर्वाचित अध्यक्ष शिव कुमार वर्माको नेतृत्वमा रहेको समितिलाई स्वागत गरिएको हो ।

समितिलाई गरिएको स्वागतपछि बोल्दै बासका केन्द्रीय अध्यक्ष वर्माले बासको दशौं केन्द्रीय महाधिबेशन सफल पार्न कर्मचारीले महत्वपूर्ण भूमिका निर्वाह गरेकोमा धन्यबाद ज्ञापन गरेका थिए । सबैको साथ र सहयोगमा उत्कृष्ट कार्यसमिति चयन भएको भन्दै उनले कार्यसमितिले सदैब कर्मचारीको हितमा कार्य गर्ने प्रतिबद्धता ब्यक्त गरे । कार्यसमिति र कर्मचारी बीचको सम्बन्ध बलियो भयो भने मात्रै संस्था अगाडि बढ्ने भन्दै बर्माले सोही अनुसारको वातावरण सिर्जना गर्न केन्द्रीय समिति लाग्ने उनको भनाई थियो । उनले केन्द्रीय कार्यालयले गरेको स्वागतले थप जिम्मेवार बनाएको बताए । संस्थाको अभियानलाई थप सशक्त बनाउँदै लैजाने उनको प्रतिबद्धता थियो ।

बासका निर्वतमान अध्यक्ष लुना बुढाथोकीले अहिलेको समिति सशक्त समिति रहेको भन्दै यो अवधिमा संस्थागत प्रगति बढ्दै जाने विश्वास ब्यक्त गरिन् । बासका केन्द्रीय उपाध्यक्ष खुमेश सुबेदीले उपाध्यक्षमा निर्वाचित भएसँगै उपाध्यक्षको हैसियतले आफूले संस्थागत शुद्धिकरणमा बिशेष ध्यान दिने प्रतिबद्धता ब्यक्त गरे । यसैगरी अर्का उपाध्यक्ष दिला शाहले संस्थागतरुपमा थप जिम्मेवारी प्राप्त भएकोमा त्यसको पूर्ण सदुपयोग गर्दै संस्थागत सुदृढीकरणमा लाग्ने बताइन् ।

कार्यक्रममा बोल्दै बासका केन्द्रीय महासचिब कल्पना अधिकारीले संस्थाको केन्द्रीय कार्यसमिति र ब्यवस्थापन समिति संगसंगै अगाडि बढेमा मात्रै संस्थाले सफलता हासिल गर्ने भन्दै सो कुरामा ध्यान दिइने बताइन् । उनले संस्थागत ब्यवस्थापनलाई थप अब्बल बनाउन आफ्नो भूमिका रहने प्रतिबद्धता ब्यक्त गरिन् । बासका प्रबन्धक मन भण्डारीले सञ्चालन गरेको कार्यक्रममा स्वागत तथा संस्थागत अवस्थाको बिषयमा बासका निमित्त कार्यकारी निर्देशक भट्टले जानकारी गराएका थिए । स्वागत तथा बधाई ज्ञापन कार्यक्रममा नवनिर्वाचित केन्द्रीय पदाधिकारी, पूर्व केन्द्रीय अध्यक्ष रमेश सिटौला र कर्मचारीहरुको सहभागिता रहेको थियो ।

प्रकाशित मिति: सोमबार, चैत २५, २०८१ २१:००