दिवंगत पत्रकार रजकको सम्झनामा दीप प्रज्ज्वलन

समाचार

गृहपृष्ठ
समाचार
दिवंगत पत्रकार रजकको सम्झनामा दीप प्रज्ज्वलन

दिवंगत पत्रकार रजकको सम्झनामा दीप प्रज्ज्वलन

बुधबार, चैत २७, २०८१ बागेश्वरी पोस्ट

नेपालगञ्ज । नेपाल पत्रकार महासंघ बाँकेले दिवंगत पत्रकार सुरेश रजकको सम्झनामा आज साँझ नेपालगञ्जको वीपी चोकमा दीप प्रज्ज्वलन एवम् श्रद्धाञ्जली सभा गरेको छ ।

महासंघको अगुवाईमा पत्रकारहरूले दीप प्रज्ज्वलन गरी यही चैत १५ गते काठमाडौंको तीनकुनेमा राजावादीहरुको हिंसात्मक प्रदर्शनका क्रममा हत्या गरिएका पत्रकार रजकप्रति श्रद्धाञ्जली अर्पण गरेका हुन् । आज उनको १३औं दिनको पूण्यतिथिका अवसरमा श्रद्धाञ्जली सभा गरिएको हो । पूर्व राजाका समर्थकहरूले तीनकुनेमा गरेको प्रदर्शनका क्रममा घरभित्र रहेर भिडियो खिच्दै गरेका रजकको जलेर मृत्यु भएको थियो ।

महासंघ बाँके अध्यक्ष नवीन गिरीले रजकको दिवंगत आत्माको चीरशान्तिको कामना गर्दै दीप प्रज्ज्वलन गरिएको बताए । उनले तीनकुने घटनामा हत्या भएका रजकको हत्यारा पत्ता लगाई कारबाही गर्न तथा त्यसक्रममा विभिन्न सञ्चार माध्यम र पत्रकारमाथि भएको आक्रमणको छानविनसंगै उचित क्षतिपूर्तिको माग गर्दै चैत १८ गते सरकारलाई दिएको सात दिने अल्टिमेटम सकिँदा पनि माग पूरा नगरेकोप्रति महासंघ गम्भीर भएको बताए । गिरीले आफ्ना माग पूरा गराउन सरकारलाई थप दबाब दिनुपर्ने अवस्था सिर्जना भएको निष्कर्षसहित नेपाल पत्रकार महासंघ अर्को चरणको आन्दोलनमा उत्रिएको बताए ।

प्रकाशित मिति: बुधबार, चैत २७, २०८१ २२:२९