संरक्षणका लागि सामूहिक ऐक्यबद्धता हुन जरुरी रहेकोमा जोड

समाचार

गृहपृष्ठ
समाचार
संरक्षणका लागि सामूहिक ऐक्यबद्धता हुन जरुरी रहेकोमा जोड

संरक्षणका लागि सामूहिक ऐक्यबद्धता हुन जरुरी रहेकोमा जोड

शनिबार, जेठ १०, २०८२ बागेश्वरी पोस्ट

नेपालगञ्ज । बाँके राष्ट्रिय निकुञ्जको जैविक विविधता संरक्षणका लागि सामूहिक ऐक्यबद्धता जरुरी रहेको एक कार्यक्रमका सहभागीहरुले बताएका छन् । क्रियाशिल पत्रकार महिला बाँकेको आयोजना तथा बाँके राष्ट्रिय निकुञ्जको सहकार्यमा आज बाँके राष्ट्रिय निकुञ्जमा पत्रकार महिलाहरुसंग गरिएको अन्तरक्रिया कार्यक्रमका सहभागी पत्रकार महिलाहरुले यस्तो बताएका हुन् । उनीहरुले बाँके राष्ट्रिय निकुञ्जले संरक्षणका लागि बनाएका योजना तथा कार्यक्रममा ऐक्यबद्धता जनाउँदै सहभागी हुन सकेमा पर्यावरणीय संरक्षण हुनुका साथै पर्यापर्यटनले पनि फड्को मार्ने बताएका हुन् ।

कार्यक्रममा बाँके राष्ट्रिय निकुञ्जका प्रमुख बरिष्ठ संरक्षण अधिकृत बिरेन्द्र प्रसाद कँडेलले अहिले बन्यजन्तुको संख्यामा बृद्धि भएको बताउँदै स्थापनाको उद्देश्य अनुसार कार्य भइरहेको बताए । उनका अनुसार बाघ संरक्षणमा निकुञ्जले सफलता हासिल गरेको छ । सन् २०२२ को सर्वेक्षण अनुसार बाँके राष्ट्रिय निकुञ्जमा २५ वटा बाघ रहेका छन् । यस्तै स्तनधारी बन्यजन्तु ३४, चरा २ सय ७६, सरिसृप २४, उभयचर ९ र माछा ५५ गरी ४ सय २२ प्रजाति रहेका छन् । जसमा दुर्लभ र सामान्य गरेर समेत प्रजातिको विभाजन गरीएको छ । यस्तै निकुञ्जका संरक्षण अधिकृत मन्दिप पंगेनीका अनुसार बाँके राष्ट्रिय निकुञ्जमा ८० वटा कृत्रिम पोखरी निर्माण गरिएता पनि १६ वटा मात्र सञ्चालित अवस्थामा रहेका छन् । जसमध्ये १३ वटामा सोलार सिस्टम जडान गरिएको छ । नेपालको १०औं राष्ट्रिय निकुञ्जको रुपमा स्थापना भएको निकुञ्जले सबै सरोकारवालाहरुसंग समन्वयात्मक रुपमा कार्य अगाडि बढाएको पनि संरक्षण अधिकृत पंगेनीले बताए ।

कार्यक्रममा क्रियाशिल पत्रकार महिला बाँकेका संस्थापक अध्यक्ष अक्षरी पोखरेलले पत्रकार महिलाहरुले जङ्गगल सफारीका साथै जैविक विविधता संरक्षणका लागि स्थलगत रिपोर्टिङ्ग गर्दा विविध वातावरणीय सवालका बारेमा उजागर भएको बताइन् । यस्तै क्रियाशिल पत्रकार महिला बाँकेका अध्यक्ष साबित्री गिरीले स्थलगत रिपोर्टिङ्गले बाँके राष्ट्रिय निकुञ्जका वन्यजन्तु र तिनको बासस्थान, बनेका भौतिक संरचना, बन्यजन्तुको आहारब्यहारका साथै मध्यवर्ती क्षेत्र ब्यबस्थापनका बिषयमा पनि मिडियामा सवाल उठाउन सहज भएको बताइन् । अध्यक्ष गिरीले वातावरणीयसंगै आगामी दिनमा कृषि, पर्यटन, शिक्षा, स्वास्थ्य लगायत बिविध बिषयगत क्षेत्रको सामूहिक अवलोकन गर्ने र बिषयबस्तु उठान गर्ने बताएकी छिन् । आज गरीएको जङ्गल सफारी र अन्तरक्रिया कार्यक्रममा बाँकेका विभिन्न मिडियामा कार्यरत पत्रकार महिलाहरुको सहभागिता रहेको थियो ।

प्रकाशित मिति: शनिबार, जेठ १०, २०८२ १९:४४

प्रतिक्रिया दिनुहोस्