द्वन्दकालमा मारिएका पत्रकार 'इच्छुक' लाई नेपालगञ्जमा स्मरण

समाचार

गृहपृष्ठ
समाचार
द्वन्दकालमा मारिएका पत्रकार 'इच्छुक' लाई नेपालगञ्जमा स्मरण

द्वन्दकालमा मारिएका पत्रकार 'इच्छुक' लाई नेपालगञ्जमा स्मरण

मंगलबार, जेठ १३, २०८२ बागेश्वरी पोस्ट

नेपालगञ्ज । द्वन्दकालमा मारिएका पत्रकार कृष्ण सेन 'इच्छुक' लाई आज नेपालगञ्जमा स्मरण गरिएको छ । २०५९ साल जेष्ठ ६ गतेका दिन गिरफ्तारपछि २०५९ साल जेठ १३ गते महेन्द्र पुलिस क्लबमा कठोर यातना दिएर मारिएका इच्छुकको २३औं स्मृति दिवसमा आज प्रेस सेन्टर नेपाल बाँकेले 'इच्छुक र जनपक्षीय पत्रकारिता' विषयक अन्तरक्रिया कार्यक्रम गरेको थियो । साहित्य र पत्रकारितालाई संगसंगै अगाडि बढाएका इच्छुक बहुप्रतिभाशाली व्यक्ति थिए । जनयुद्मा जस्तै जनसाहित्यमा पनि कृष्णसेनको योगदान महत्त्वपूर्ण छ ।

कार्यक्रममा बोल्दै माओवादी केन्द्रकी स्थायी समिति सदस्य पुर्ण कुमारी सुबेदीले पत्रकारिता, साहित्य र जनयुद्धमा इच्छुकको अविस्मरणीय योगदान रहेको भन्दै उनीबाट अहिलेको पुस्ताले धेरै कुरा सिक्न सक्नुपर्नेमा जोड दिइन् । नेपाल पत्रकार महासंघ बाँकेका अध्यक्ष नवीन गिरीले इमान्दार, निष्ठावान र निडर भएर समाज र जनताको पक्षमा कलम चलाउन सके मात्र कृष्णसेनप्रति सच्चा श्रद्धाञ्जली हुने विचार ब्यक्त गरे । पत्रकारिता जहिले पनि जनपक्षीय हुने भन्दै गिरीले पत्रकारहरुले सत्यका पक्षमा निष्ठापूर्वक कलम चलाउनुपर्नेमा जोड दिए ।

कार्यक्रममा प्रेस संगठन नेपालका केन्द्रिय सदस्य सुशिल लामिछाने, प्रदेश अध्यक्ष प्रदिप वाग्ले, पूर्व केन्द्रिय सदस्य डक्ट प्रसाद धिताल, नेपाल पत्रकार महासंघ बाँकेका संस्थापक अध्यक्ष लियाकत अली, पूर्व अध्यक्षद्वय निरज गौतम र झलक गैरे, नेपाल प्रेस युनियन बाँकेका अध्यक्ष प्रियास्मृति ढकाल, प्रेस चौतारी बाँकेका अध्यक्ष कमल डाँगी, अग्रज पत्रकार शरण कर्माचार्य, साहित्यकारद्वय मणि अर्याल र डा. इन्द्र बहादुर भण्डारी लगायतले सेनको ब्यक्तित्वमाथि चर्चा गर्दै श्रद्धाञ्जली अर्पण गरेका थिए । कार्यक्रममा पत्रकारहरु विपी अस्तु र कपिल अञ्जानले सेनको साहित्यिक व्यक्तित्वको चर्चा गर्दै कविता वाचन समेत गरेका थिए । प्रेस सेन्टर बाँकेका अध्यक्ष चन्द्र बोहराको अध्यक्षतामा कार्यक्रम सम्पन्न भएको थियो ।

प्रकाशित मिति: मंगलबार, जेठ १३, २०८२ २१:१८