नेपालगञ्ज-दिल्ली उडानका लागि दवाब समूह गठन

समाचार

गृहपृष्ठ
समाचार
नेपालगञ्ज-दिल्ली उडानका लागि दवाब समूह गठन

नेपालगञ्ज-दिल्ली उडानका लागि दवाब समूह गठन

शुक्रबार, जेठ २३, २०८२ बागेश्वरी पोस्ट

नेपालगञ्ज । नेपालगञ्ज–दिल्ली उडानका लागि नेपालगञ्ज उद्योग वाणिज्य संघका अध्यक्ष टंक बहादुर धामीको नेतृत्वमा १६ सदस्यीय दवाब समूह गठन गरिएको छ । लुम्बिनी प्रदेशका सांसद एवम् पूर्व मन्त्री कृष्णा केसी नमुनाको प्रमुख आतिथ्यतामा बाँकेका उद्योगी, व्यवसायी, राजनीतिक दल, नागरिक समाज, प्रहरी, प्रशासन, पर्यटन व्यवसायी लगायतका सरोकारवालाहरुको शुक्रबार नेपालगञ्जमा सम्पन्न छलफल कार्यक्रमले धामी संयोजक रहेको १६ सदस्यीय नेपालगञ्ज–दिल्ली उडान दवाब समूह गठन गरेको हो ।

समितिमा पशुपतिदयाल मिश्र, कृष्णप्रसाद श्रेष्ठ, दिवाकर खनाल, श्रीराम सिग्देल, सुधांशु कोइराला, मीनबहादुर मल्ल, प्रेमबहादुर शाह, राजेन्द्र श्रेष्ठ, करिश्मा योगी, उमा थापा मगर, नन्दलाल वैश्य, नवीन गिरी, रंग बहादुर खड्का, आशिष गुप्ता र सदस्य सचिव भीम बहादुर रानाभाट रहेका छन् ।

नेपालगञ्ज दिल्ली उडानका लागि गठन गरिएको दवाब समूह समितिका संयोजक धामीले नेपालगञ्ज–दिल्ली उडान नहुँदासम्म दवाब जारी राख्ने बताए । उनले नेपालगञ्ज लुम्बिनी प्रदेशको प्रमुख सहर मात्र नभई कर्णाली र सुदूरपश्चिम प्रदेशको पर्यटकीय गेटवे भएकाले नेपालगञ्ज–दिल्ली उडान आवश्यक रहेको बताए । चीनको तिब्बतमा रहेको कैलाश मानसरोवर जाने भारतीय तीर्थयात्री नेपालगञ्ज हुँदै जाने भएकाले पनि नेपालगञ्ज–दिल्ली उडान महत्वपूर्ण हुने उनको दाबी थियो ।

नेपालगञ्ज–दिल्ली हवाई उडानका लागि आयोजित सरोकारवालाबीचको बृहत छलफल कार्यक्रममा पश्चिम क्षेत्रको पर्यटन विकासका लागि नेपालगञ्ज–दिल्ली हवाई उडान गर्नुपर्ने सबै सरोकारवालाको धारणा छ । संघीय संरचना अघि चलायमान रहेको नेपालगञ्ज शहर अहिले पछाडि परेको भन्दै नेपालगञ्ज लगायत यस क्षेत्रको विकासका लागि नेपालगञ्ज-दिल्ली हवाई उडान गर्नुपर्ने सम्बद्धले बताएका छन् ।

प्रदेश सांसद नमुना र मिना श्रेष्ठ, नेपालगञ्ज उपमहानगरपालिकाका प्रमुख प्रशान्त विष्ट, बाँकेका प्रमुख जिल्ला अधिकारी धर्मराज जोशी, एमालेका केन्द्रीय सदस्य पशुपति दयाल मिश्र, नेपाली काँग्रेसका सचिव सुधांशु कोइराला, एमाले नेता मिन मल्ल, माओवादीका नेता प्रेम शाह, राष्ट्रिय स्वतन्त्र पार्टीका नेता राजेन्द्र श्रेष्ठ, नेकपा एकीकृत समाजवादीकी नेतृ करिश्मा योगी, नेपाल पत्रकार महासंघ बाँकेको अध्यक्ष नवीन गिरी, नाट्टा बाँकेका अध्यक्ष श्रीराम सिग्देल, नेपालगञ्ज उद्योग बाणिज्य संघका पूर्व अध्यक्षहरु कृष्ण प्रसाद श्रेष्ठ, नन्दलाल बैश्य, होटल व्यवसायी संघका अध्यक्ष रंग बहादुर खड्का, उद्योगी सञ्जय अग्रवाल लगायतले नेपालगञ्ज–दिल्ली उडानका लागि सबै लाग्नुपर्ने बताएका थिए ।

नेपाल सरकारले नै यसको आवश्यकता महसूस गरेर कुटनीतिक ढंगले लाग्नुपर्नेमा सरोकारवालाको जोड छ । त्यसका लागि निरन्तर दबाब जरुरी रहेको सहभागीहरुको भनाई छ । नेपालगञ्ज–दिल्ली उडानका लागि यस अघि नै प्रयास गरे पनि त्यसले सार्थकता पाएको छैन ।

प्रकाशित मिति: शुक्रबार, जेठ २३, २०८२ २२:२२