वीपी कोइरालाको ४३औं स्मृति दिवसमा बाँकेमा विभिन्न कार्यक्रम गरिँदै

राजनीति

गृहपृष्ठ
राजनीति
वीपी कोइरालाको ४३औं स्मृति दिवसमा बाँकेमा विभिन्न कार्यक्रम गरिँदै

वीपी कोइरालाको ४३औं स्मृति दिवसमा बाँकेमा विभिन्न कार्यक्रम गरिँदै

आइतबार, साउन ४, २०८२ बागेश्वरी पोस्ट

नेपालागञ्ज । निरंकुश राणा शासनविरुद्ध नेपालमा शुरु गरिएको क्रान्तिको अगुवाई गर्ने लोकतान्त्रिक आन्दोलनका नायक, नेपाली काँग्रेसका पूर्व पार्टी सभापति एवम् प्रथम जननिर्वाचित प्रधानमन्त्री स्वर्गीय वीपी कोइरालाको ४३औं स्मृति दिवस साउन ६ गतेदेखि विभिन्न रचनात्मक तथा सिर्जनात्मक कार्यक्रमको आयोजना गरी देशैभरि मनाइँदैछ ।

काँग्रेसका अनुसार स्मृति दिवसका अवसरमा देशैभर वृक्षारोपणका साथै वीपी कोइरालाको योगदानबारे चर्चा, परिचर्चा, लोकतान्त्रिक आन्दोलनका योद्धा तथा समाजमा महत्वपूर्ण योगदान पुर्याउने व्यक्तिहरुलाई सम्मान एवम् खेलकुद तथा शैक्षिक प्रतियोगिता लगायतका कार्यक्रम गरी स्मृति दिवस मनाउने कार्यक्रम तय गरिएको छ ।

नेपाली काँग्रेस बाँकेले पनि विभिन्न कार्यक्रमको आयोजना गरी स्थानीय तहमा स्मृति दिवस मनाउँदैछ । पार्टी सभापति नारायण प्रसाद गौडेलका अनुसार साउन ६ गते बिहान साढे ७ बजे नेपालगञ्ज वीपी चोकस्थित जननायक वीपी कोइरालाको शालिकमा माल्यार्पण, सोही दिन बिहान साढे १० बजे कोहलपुर-८ पिपरीस्थित शितल बनवाटिका तथा जैविक पार्कमा वृक्षारोपण कार्यक्रम राखिएको छ ।

यस्तै, साउन ६ गते प्रजातान्त्रिक सेनानी संघले बाँकेको कम्दीस्थित गौशालामा वृक्षारोपण कार्यक्रम राखेको छ भने सोही दिन प्रजातन्त्र सेनानी स्वर्गीय माया गिरीलाई मरणोपरान्त सम्मान गरिने संघका सचिव कृष्ण सापकोटाले बताए ।

स्मृति दिवसकै अवसरमा नेपाली काँग्रेस राप्तीसोनारी गाउँपालिकाका सबै वडा समितिहरुले साउन ६ गते वृक्षारोपण लगायतका कार्यक्रम गर्ने निर्णय गरेका छन् भने साउन ८, ९, १० र १२ नेपाल किसान महासंघले खजुरास्थित सुशील कोइराला क्यान्सर अस्पताल प्रागंणमा वृक्षारोपण, हडियाबाबा मन्दिरमा सरसफाई, किसानहरुलाई निःशुल्क बीउविजन वितरण र वक्तृत्वकला प्रतियोगिता आयोजना गरेको छ ।

यसैगरी नेपाली काँग्रेस बाँके क्षेत्र नं. १ क्षेत्रीय समितिले साउन ७ गते राप्तीसोनारी-७ नन्कौपुरस्थित अमरज्योति माविको प्रागंणमा पाठेघरको मुखको क्यान्सरको पहिचान तथा बाँझोपन सम्बन्धि एक दिने स्वास्थ्य शिविर आयोजना गर्दैछ । स्मृति दिवसका अवसरमा नेपाली काँग्रेस बाँके, क्षेत्रीय समिति तथा भ्रातृ संगठनहरुले आयोजना गर्ने कार्यक्रमहरुमा पार्टी सभापति गौडेल, उपसभापति गोपाल प्रसाद अधिकारी, सचिव सुधांशु कोइराला, कोषाध्यक्ष यज्ञ बहादुर बस्नेत, प्रवक्ता डिल्ली गिरी लगायतका नेता, कार्यकर्ता तथा स्थानीयहरुको उपस्थिति रहने जनाइएको छ ।

प्रकाशित मिति: आइतबार, साउन ४, २०८२ १९:३७

प्रतिक्रिया दिनुहोस्