वीपी कोइरालाको स्मृति दिवसको अवसरमा सरसफाई तथा वृक्षारोपण

राजनीति

गृहपृष्ठ
राजनीति
वीपी कोइरालाको स्मृति दिवसको अवसरमा सरसफाई तथा वृक्षारोपण

वीपी कोइरालाको स्मृति दिवसको अवसरमा सरसफाई तथा वृक्षारोपण

सोमबार, साउन १२, २०८२ बागेश्वरी पोस्ट

नेपालगञ्ज । नेपाली काँग्रेसका पूर्व पार्टी सभापति एवम् प्रथम जननिर्वाचित प्रधानमन्त्री स्वर्गीय वीपी कोइरालाको ४३औं स्मृति दिवसको अवसरमा नेपालगञ्जको मंगल प्रसाद माविमा आज सरसफाई तथा वृक्षारोपण गरिएको छ ।

नेपाली काँग्रेस बाँके २ नम्बर क्षेत्रीय कार्यसमितिले आयोजना गरेको सरसफाई तथा वृक्षारोपण कार्यक्रममा पार्टीका केन्द्रीय सदस्य मैकुलाल बाल्मिकी, बाँके सभापति नारायण प्रसाद गौडेल, सचिव सुधांशु कोइराला, कोषाध्यक्ष यज्ञ बहादुर बस्नेत, पूर्व मन्त्री सुरेन्द्र बहादुर हमाल, महिला नेतृ उमा थापा मगर लगायत जिल्ला स्तरीय नेता तथा कार्यकर्ता, विद्यालयका शिक्षक-शिक्षिका र विद्यार्थीहरुको सहभागिता रहेको थियो । सरसफाई तथा वृक्षारोपण कार्यक्रमलाई नेपाल स्काउटका छात्रछात्राहरुले सघाएका थिए ।

नेपाली काँग्रेस बाँके क्षेत्र नम्बर २ का क्षेत्रीय सभापति रमेश कुमार गुप्ताका अनुसार कार्यक्रममा विद्यालय प्रागंणको झारपात तथा फोहरहरुको सरसफाई गरिनुका साथै विभिन्न जातका ३५ वटा विरुवा रोपिएका थिए । कार्यक्रममा जननायक स्वर्गीय विपी कोइराला र संविधानका पिता, पूर्व पार्टी सभापति एवम् पूर्व प्रधानमन्त्री सुशील कोइरालाको तस्वीरमा माल्यार्पण गरिएको थियो । त्यस अवसरमा लोकतान्त्रिक आन्दोलनका क्रममा शहादत प्राप्त गरेका शहिदहरुप्रति एक मिनेट मौनधारण गरी भावपूर्ण श्रद्धाञ्जली अर्पण गरिएको थियो ।

क्षेत्रीय सभापति गुप्ताको अध्यक्षतामा भएको सरसफाई तथा वृक्षारोपण कार्यक्रममा केन्द्रीय सदस्य बाल्मिकी, बाँके सभापति गौडेल, सचिव कोइराला, कोषाध्यक्ष बस्नेत, पूर्व मन्त्री हमाल, नेता सुनिल सिंह राणा, महिला नेतृ थापा मगर, विद्यालयका प्रधानाध्यापक सन्ध्या गुप्ता लगायतले विपी कोइरालाको बहुआयामिक ब्यक्तित्व र काँग्रेसको सांगठानिक अवस्थाबारे प्रकाश पारेका थिए ।

प्रकाशित मिति: सोमबार, साउन १२, २०८२ २०:०२

प्रतिक्रिया दिनुहोस्