बाँकेका विभिन्न स्थानमा चाडपर्व लक्षित 'यात्रु सहायता कक्ष' स्थापना

समाचार

गृहपृष्ठ
समाचार
बाँकेका विभिन्न स्थानमा चाडपर्व लक्षित 'यात्रु सहायता कक्ष' स्थापना

बाँकेका विभिन्न स्थानमा चाडपर्व लक्षित 'यात्रु सहायता कक्ष' स्थापना

बिहीबार, असोज ९, २०८२ बागेश्वरी पोस्ट

नेपालगञ्ज । बडादशैं लगायत नजिकिँदै गरेका चाडपर्वलाई लक्षित गर्दै बाँकेका विभिन्न स्थानमा यात्रु सहायता कक्षको स्थापना गरी सञ्चालनमा ल्याइएको छ । चाडपर्वका अवसरमा सार्वजनिक यातायातमा हुने भिडभाड व्यवस्थापन तथा यात्रा गर्ने यात्रुहरुको सहायताका लागि नेपालगञ्ज ४ बसपार्क, नेपालगञ्ज १५ जमुनाहा र कोहलपुर ११ स्थित बसपार्कमा यात्रु सहायता कक्षको स्थापना गरी सञ्चालनमा ल्याइएको जिल्ला ट्राफिक प्रहरी कार्यालय बाँकेले जानकारी दिएको छ ।

चाडपर्वका बेलामा सुरक्षित यात्रा र यात्रुहरुको सुविधाको लागि सवारीचालक एवं यातायात व्यवसायीहरुलाई विशेष ध्यान पुर्याउन ट्राफिक प्रहरी कार्यालय बाँकेले आग्रह गरेको छ । चाडपर्वका बेलामा जिल्लाभित्र चल्ने सवारी साधन र बाहिरबाट भित्रिने सवारी साधनमा यात्रुलाई पर्ने समस्या समाधानका लागि सहायता कक्षको स्थापना गरिएको हो । बाँके ट्राफिक प्रहरी कार्यालयका प्रमुख प्रहरी निरीक्षक पुष्कर पन्तका अनुसार चाडपर्वको बेलामा यात्रुहरुले विभिन्न सास्ती पाउन सक्ने भन्दै यातायातका साधनको सबैभन्दा बढी भिडभाड हुने कोहलपुर बसपार्क, नेपालगञ्ज बसपार्क र भारतबाट आउनेको यात्रुका लागि जमुनाहामा सहायता कक्ष स्थापना गरिएको हो ।

चाडपर्वको समयमा यातायातका साधनमा दोहोरो टिकट काटेर यात्रुले दुःख पाउने, भाडाका कारण यात्रु ठगिने, यात्रुहरुको सामान हराउने, सवारीमा क्षमता भन्दा बढी यात्रु राख्दा दुर्घटनाको जोखिम हुने लगायतका समस्या कम गराउन सहायता कक्ष स्थापना गरिएको ट्राफिक प्रहरी प्रमुख पन्तले बताए । त्यसैगरी जमुनाहामा भारतबाट आउने यात्रुहरुको सहयोगका लागि जमुनाहामा सहायता कक्षको स्थापना गरिएको नेपालगञ्ज ट्राफिक कार्यालयक इन्चार्ज वरिष्ठ प्रहरी नायब निरीक्षक नन्दकुमार पोखरेलले जानकारी दिए ।

उनका अनुसार यात्रुहरुको गुनासोको सुनुवाई समेत ट्राफिक प्रहरीले गर्नेछ । कुनै पनि यात्रुलाई समस्या परे तत्काल जिल्ला प्रहरी कार्यालय अथवा जिल्ला ट्राफिक प्रहरी कार्यालयमा फोन गरेर वा ड्युटीमा रहेका प्रहरीलाई भेटेर यात्राको बारेमा गुनासो गर्न सकिने र यात्रु सहायता कक्षबाटै यात्रुका समस्या समाधानको प्रयास गरिने पोखरेल बताए ।

प्रकाशित मिति: बिहीबार, असोज ९, २०८२ २१:०६

प्रतिक्रिया दिनुहोस्