जाँचबुझ आयोगका प्रबक्ता शर्मा भन्छन्-'निर्भिक र निष्पक्ष भएर प्रतिबेदन तयार गर्छौं'

समाचार

गृहपृष्ठ
समाचार
जाँचबुझ आयोगका प्रबक्ता शर्मा भन्छन्-'निर्भिक र निष्पक्ष भएर प्रतिबेदन तयार गर्छौं'

जाँचबुझ आयोगका प्रबक्ता शर्मा भन्छन्-'निर्भिक र निष्पक्ष भएर प्रतिबेदन तयार गर्छौं'

शुक्रबार, कात्तिक १४, २०८२ बागेश्वरी पोस्ट

नेपालगञ्ज । जेन–जी आन्दोलनका क्रममा भएको भौतिक एवम् मानवीय क्षतिको यथार्थ छानबिनका लागि गठित जाँचबुझ आयोगका सदस्य एवम् प्रबक्ता विज्ञान राज शर्माले निष्पक्ष र निर्भिक रूपमा प्रतिवेदन तयार पारिने प्रतिबद्धता ब्यक्त गरेका छन् । भदौ २३ र २४ गतेको आन्दोलनका क्रममा सार्वजनिक सम्पत्ति, भौतिक संरचना, निजी घर एवम् प्रतिष्ठानमा भएको क्षतिको स्थलगत अध्ययन तथा सरोकारवालासंग छलफलका लागि बाँके आएका शर्माले आज नेपालगञ्जमा आयोजित कार्यक्रममा आयोगले कुनै पूर्वाग्रह नराखी प्रतिवेदन बुझाउने बताए । उनले फौजदारी अपराधमा प्रहरीलाई अनुसन्धान र कारवाही गर्ने अधिकार यथावत रहेको स्पष्ट पार्दै भने, “आयोगले कारवाही गर्ने होइन, केवल घटनाको यथार्थ अवस्थाबारे सरकारलाई जानकारी दिने हो।” आपराधिक घटनाको अनुसन्धान र अभियोजन गर्न कुनै रोकटोक नरहेको उनले स्पष्ट पारे ।

कार्यक्रममा कोहलपुर नगरपालिकाका प्रमुख पुर्ण प्रसाद आचार्यले आन्दोलनका नाममा अराजक समूहले सरकारी संरचना र आफ्नो निजी घरमा समेत तोडफोड र आगजनी गरेको बताए । उनले घटनालाई अपराधका रूपमा गम्भीरतापूर्वक लिन आग्रह गरे । उद्दण्डता मच्चाउनेहरुलाई कुनै पनि बहानामा उन्मुक्ति दिन नहुनेमा आचार्यको जोड छ । नेपालगञ्ज उपमहानगरपालिकाका प्रमुख प्रशासकीय अधिकृत रामहरि शर्माले आगजनी र लुटपाटमा संलग्नहरुको पहिचान गरी कार्वाहीको दायरामा ल्याउनुपर्ने बताए ।

कार्यक्रममा सहभागीले विगतका आयोगका प्रतिवेदन कार्यान्वयन नभएकाले यसपटक पनि त्यस्तै हुने हो कि भन्ने आशंका व्यक्त गरेका छन् । उनीहरूले घटनामा संलग्नलाई कानूनी कारवाही गर्न आयोग र सरकार गम्भीर हुनुपर्ने माग गरे । कार्यक्रममा नेकपा एमाले लुम्विनी प्रदेशका सदस्य घननाथ खनाल, काँग्रेस बाँकेका सचिव सुधान्शु कोइराला, जिल्ला समन्वय समिति संयोजक ज्ञानेन्द्र कुमार चौधरी, जिल्ला प्रहरी प्रमुख प्रहरी उपरीक्षक अंगुर जिसी, नेपाल पत्रकार महासंघ बाँकेका अध्यक्ष नवीन गिरी, उच्च अदालत नेपालगन्ज बारका अध्यक्ष चित्र बहादुर शाही, इन्सेक लुम्बिनी संयोजक भोला महत, नेपालगन्ज उद्योग बाणिज्य संघका पूर्व अध्यक्ष कृष्ण प्रसाद श्रेष्ठ लगायतले बोलेका थिए । त्यसक्रममा आगजनी र तोडफोड गरिएका सरकारी कार्यालयका प्रमुख एवम् प्रतिनिधिले कार्यालयको क्षति र अहिलेको सेवा प्रवाहको अवस्थाबारे जानकारी गराएका थिए । जिल्ला प्रशासन कार्यालय बाँकेका निमित्त प्रमुख जिल्ला अधिकारी पुर्ण खत्रीको अध्यक्षतामा सम्पन्न भएको थियो ।

प्रकाशित मिति: शुक्रबार, कात्तिक १४, २०८२ १८:४५

प्रतिक्रिया दिनुहोस्