'किसानका आवाज बुलन्द पार्ने अभियानमा महासंघ लागेको छ'-अध्यक्ष तिमिल्सिना

समाचार

गृहपृष्ठ
समाचार
'किसानका आवाज बुलन्द पार्ने अभियानमा महासंघ लागेको छ'-अध्यक्ष तिमिल्सिना

'किसानका आवाज बुलन्द पार्ने अभियानमा महासंघ लागेको छ'-अध्यक्ष तिमिल्सिना

सोमबार, कात्तिक २४, २०८२ बागेश्वरी पोस्ट

नेपालगञ्ज । नेपाल किसान महासंघका केन्द्रिय अध्यक्ष गणेशचन्द्र तिमिल्सिनाले किसानका आवाज बुलन्द पार्ने अभियानमा महासंघ रहेको प्रष्ट पारेका छन् । त्यसका लागि महासंघ देश दौडाहामा रहेको बताए । नेपालगञ्जमा सोमबार आयोजित पत्रकार भेटघाटमा उनले महासंघले अगाडि सारेका एजेण्डालाई जिल्ला जिल्लामा पुर्‍याइने दाबी गरे । 'तितरबितर भएका किसान संगठनलाई एक बनाएर महासंघ अगाडि बढेको छ,' उनले भने । उनले किसानका विभिन्न समस्या र मागलाई सम्बोधन गर्न सरकारलाई दवाव दिन महासंघले जिल्लासम्म अभियान सञ्चालन गर्न लागेको प्रष्ट्याए । ‘हाम्रा एजेण्डालाई हामी जिल्ला-जिल्लामा लिएर जान्छौं, किसानमा केही न केही चेन्ज आउनुपर्छ,’ उनले भने, ‘किसानलाई हामी आधुनिक प्रविधिसँग जोडेर ब्यवसायमुखी बनाउन चाहन्छौं ।’

महासंघले समयमै धान खरिद गर्न खाद्य ब्यवस्था तथा ब्यापार कम्पनी लिमिटेडलाई दवाव सिर्जना गर्दै आएको र उखु, दुध र स्याउ उत्पादक किसानको बाँकी बक्यौता भुक्तानी गराउन पनि सरकार लगायतका निकायसँग आवश्यक समन्वय गरेको अध्यक्ष तिमिल्सेनाको भनाई छ । किसानलाई रासायनिक मल वितरण कार्यलाई प्रभावकारी बनाउन महासंघले सरकारलाई पटक पटक ध्यानाकर्षण गराइरहेको बताउँदै भने, ‘रासायनिक मल बिक्री, वितरण गर्ने जिम्मा सहकारी संस्थालाई दिँदा कतै राम्रो भएको छ, कतिपय ठाउँमा बिकृति पनि निम्तिएको छ, किसानले सहकारीको विकल्पमा सिधै मल खरिद गर्न पाउनुपर्छ ।’ नेपाल भारत खुला सीमाका कारण नेपाली किसानले उत्पादन गर्ने बस्तुलाई भारतीय उत्पादनले बिस्थापित गर्ने गरेको उनको भनाई छ । मुलुकको बृहत्तर विकासका लागि कृषि, पर्यटन र जलस्रोतलाई प्राथमिकता दिनुपर्नेमा उनको जोड छ । 'कृषि, पर्यटन र जलस्रोतलाई एकैसाथ लिएर जानुपर्छ । त्यसो गर्न सकिएन भने मुलुकको बृहत् विकास सम्भव छैन.' उनले भने ।

प्रकाशित मिति: सोमबार, कात्तिक २४, २०८२ १८:४५

प्रतिक्रिया दिनुहोस्