मंसिरभित्रै नियमित महाधिवेशन गर्ने कार्यतालिका सार्वजनिक गर्नुपर्दछ: गिरी

राजनीति

गृहपृष्ठ
राजनीति
मंसिरभित्रै नियमित महाधिवेशन गर्ने कार्यतालिका सार्वजनिक गर्नुपर्दछ: गिरी

मंसिरभित्रै नियमित महाधिवेशन गर्ने कार्यतालिका सार्वजनिक गर्नुपर्दछ: गिरी

मंगलबार, कात्तिक २५, २०८२ बागेश्वरी पोस्ट

काठमाडौं । नेपाली कांग्रेसका केन्द्रिय सदस्य दीपक गिरीले कांग्रेस संसद पुनःस्थापनाको पक्षमा लाग्नुपर्ने बताएका छन् । केन्द्रीय कार्यसमितिको बैठकमा आफ्नो धारणा राख्दै विघटित प्रतिनिधिसभाका सांसद समेत रहेका गिरीले असंवैधानिक कदम सच्याउन र संविधान संशोधन लगायत जेन–जी आन्दोलनले उठाएका माग सम्बोधन गर्न कांग्रेस पनि संसद पुनःस्थापनाको पक्षमा लाग्नुपर्ने आवाज उठाएका हुन् । "प्रधानमन्त्री हुन वा मन्त्री हुन संसद पुनःस्थापना गर्न चाहेको होइन," गिरीले भने-"जनताका असन्तुष्टिहरुलाई समावेश गरी संविधान संशोधन गर्दा राम्रो होला भन्ने मेरो सुझाब हो । यसबारे चालू केन्द्रीय कार्यसमिति बैठकबाट औपचारिक धारणा बनाउन म आग्रह गर्न चाहन्छु ।"

गिरीले महाधिवेशन प्रतिनिधिहरुको भावनाको सम्मान गर्दै मंसिर महिनाभित्रै नियमित १५औं महाधिवेशन गर्ने कार्यतालिका सार्वजनिक गर्नुपर्ने धारणा राखे । "उक्त महाधिवेशनबाट समय सुहाउँदो, युवाहरुको आकांक्षालाई समेत प्रतिनिधित्व गर्ने खालको नीति र कार्यक्रम पारित गर्नुपर्छ," गिरीले आफ्नो धारणा राख्नेक्रममा भने-"यही स्थितिमा चुनावमा गएर के भन्ने ? नसुध्रिएको कांग्रेसलाई जनताले किन भोट दिने ? हाम्रा कमीकमजोरीका लागि क्षमा माग्दै अब कांग्रेस नयाँ नेतृत्व, नीति र कार्यक्रमसहित जनताको घर दैलोमा जानुपर्छ ।" महाधिवेशन गर्ने सवालमा मंसिर र बैशाख भनेर लोक हँसाउने काम नगर्न उनको आग्रह छ । उनले 'बिजनेस एज युजुएल' गरेर अब पार्टी र मुलुक दुबै नचल्ने यथार्थ मनन गर्नुपर्ने संगिन बेला आइसकेको बताए ।

केन्द्रीय सदस्य गिरीले गत निर्वाचनमा नेपाली काँग्रेस र अन्य दलसँग भएको गठबन्धनका उम्मेदवारलाई सहयोग नगरेको भन्ने उजुरीका आधारमा या विद्रोही उम्मेदवारलाई अनुशासन समितिबाट कारबाहीको सिफारिस गरिनु अनुपयुक्त भएको भन्दै वर्तमान राजनैतिक परिस्थितिलाई मनन गरी आममाफी दिन माग गरे । गिरीले जेन-जी आन्दोलनमा अमूल्य जीवन गुमाएका सबै युवा र सुरक्षार्थ खटिएका सुरक्षाकर्मीहप्रति भावपूर्ण श्रद्धाञ्जली अर्पण गर्दै सबै घाइतेहरूको शीघ्र स्वास्थ्य लाभको कामना गरे । गिरीले उपचारका क्रममा सिंगापुरमा रहेका पार्टी सभापति शेर बहादुर देउबा र उनकी धर्मपत्नी केन्द्रिय सदस्य आरजु राणा देउबाको शीघ्र स्वास्थ्य लाभको कामना पनि गरे ।

प्रकाशित मिति: मंगलबार, कात्तिक २५, २०८२ १४:३७

प्रतिक्रिया दिनुहोस्