बाँके-बर्दियाका बहिरा युवालाई १५ दिने छ्वाली आर्ट तालिम प्रदान

समाचार

गृहपृष्ठ
समाचार
बाँके-बर्दियाका बहिरा युवालाई १५ दिने छ्वाली आर्ट तालिम प्रदान

बाँके-बर्दियाका बहिरा युवालाई १५ दिने छ्वाली आर्ट तालिम प्रदान

शुक्रबार, मंसिर १२, २०८२ बागेश्वरी पोस्ट

नेपालगञ्ज । बाँके-बर्दियाका बहिरा युवालाई आत्मनिर्भर र उद्यमशील बनाउन १५ दिने छ्वाली आर्ट (हस्तकला) तालिम प्रदान गरिएको छ । १० जना बहिरा युवा सहभागी तालिम कृषि व्यवसाय प्रबद्र्धन तथा तालिम केन्द्र खजुरा बाँकेमा आयोजना गरिएको थियो । राष्ट्रिय बहिरा महासंघ नेपालको आयोजना एवम् नेपाल पर्यटन बोर्ड र संयुक्त राष्ट्रसंघीय विकास कार्यक्रम (युएनडिपी) संगको सहकार्यमा तालिम गरिएको हो ।

गहुँबाली भित्र्याएपछि गाईबस्तुका लागि जोहो गरी राखिने छ्वालीबाट बनाइने कलाकृतिलाई छ्वाली आर्ट (हस्तकला) भनिन्छ । तालिम समापन कार्यक्रममा बोल्दै प्रमुख अतिथि कृषि व्यवसाय प्रबद्र्धन तथा तालिम केन्द्रका प्रमुख श्रीधर ज्ञवालीले सिकेको सीपलाई व्यवहारमा उतार्न आग्रह गरे । ज्ञवालीले यो तालिमले बहिरा युवाको आयआर्जन र आत्मनिर्भरतामा टेवा पुग्ने विश्वास व्यक्त गरे ।

नेपाल पत्रकार महासंघ बाँकेका अध्यक्ष नवीन गिरीले जीवनोपयोगी सीपमूलक तालिमले फरक र विशेष क्षमता भएकाहरुको आत्मनिर्भरतामा टेवा पुग्ने विश्वास ब्यक्त गरे । गिरीले उत्पादित सामग्रीको बजारीकरणमा मिडियाको साथ रहने बताए । राष्ट्रिय बहिरा महासंघ नेपालका अध्यक्ष सन्तोष केसीले कृषिमा खेर गइरहेका बस्तुहरुको सदुपयोग गरेर सीप प्रबद्र्धन गर्दै बहिरा युवाहरुको आयआर्जनमा टेवा पुर्याउने उद्देश्यले तालिम आयोजना गरिएको बताए । उनले छ्वाली आर्टको विदेशमा उच्च माग रहेको समेत बताए । केसीले बाँके राष्ट्रिय निकुञ्ज र बर्दिया राष्ट्रिय निकुञ्जको पर्यटन प्रबद्धनार्थ प्रचारप्रसार गर्ने उद्देश्य पनि रहेको बताए । आगामी दिनमा सातै प्रदेशमा यस प्रकारको तालिम सञ्चालन गर्ने लक्ष्य रहेको केसीको भनाई छ । अध्यक्ष केसीले महासंघले काठमाडौंमा ट्रेकिङ गाइड र बरिस्ठा (कफी बनाउने) तालिम भइरहेको पनि जानकारी दिए ।

तालिमका सहभागीलाई प्रमुख अतिथि ज्ञवाली, महासंघ बाँके अध्यक्ष गिरी र राष्ट्रिय बहिरा महासंघ नेपालका अध्यक्ष केसीले प्रमाणपत्र प्रदान गरेका थिए । प्रमुख प्रशिक्षक गगनतारा हस्तकलाका प्रमुख सिताराम गोसाइँ र सहायक प्रशिक्षक विष्णुकेशरी देशमरुले तालिम प्रदान गरेका थिए । त्यसक्रममा दोभाषेद्वय प्रकाश महर्जन र विश्वास अधिकारीले सहजीकरण गरेका थिए । तालिमका प्रशिक्षार्थीद्वय रमेश खड्का र अञ्जली चौधरीले तालिम निकै उपयोगी भएको बताए ।

May be an image of one or more people and text