नेताको विरोधको नाममा मर्यादा नाघ्न पाइँदैनः राठौर

राजनीति

गृहपृष्ठ
राजनीति
नेताको विरोधको नाममा मर्यादा नाघ्न पाइँदैनः राठौर

नेताको विरोधको नाममा मर्यादा नाघ्न पाइँदैनः राठौर

शुक्रबार, मंसिर २६, २०८२ बागेश्वरी पोस्ट

नेपालगञ्ज । नेपाली काँग्रेसका सहमहामन्त्री किशोरसिंह राठौरले नेपाली काँग्रेस लोकतान्त्रिक पार्टी भएकाले नेताको विरोध हुनु स्वभाविक भए पनि नेताको विरोधको नाममा मर्यादा नाघ्न नपाइने बताएका छन् । काँग्रेसको लुम्बिनी प्रदेश स्तरीय कार्यक्रमलाई आज लमहीमा सम्वोधन गर्दै सहमहामन्त्री राठौरले नेताको कार्यशैलीको विरोध लोकतान्त्रिक संस्कारभित्रै पर्ने तर नेताको विरोधको नाममा मर्यादा नाघ्न कसैले नपाउने बताए । उनले काँग्रेसमा वीपी, सुवर्ण, गणेशमान र कृष्णप्रसादकै पालामा पनि गुट एवं आन्तरिक प्रतिस्पर्धा हुने गरेको, त्यो आज पनि रहेको र भोलि पनि रहने बताए । "काँग्रेसमा गुट एवं आन्तरिक प्रतिस्पर्धा स्वभाविक हो तर त्यसको नाममा चार तारे झण्डा र रुख चिन्हमाथि अहित हुने काम कसैले गर्न पाउँदैन," उनले भने ।

राज्यका तीन वटै अंग जलाइएको, दर्जनौं नेपाली मारिएको, पार्टीका केन्द्रदेखि जिल्लासम्मका पार्टी कार्यालय ध्वस्त पारिएको, सभापति शेरबहादुर देउवा र नेतृ आरजु राणामाथि आक्रमण गरिएका बेला संयमता देखाउनुपर्नेमा पार्टीकै नेताहरुद्वारा अमर्यादित क्रियाकलाप प्रस्तुत गरिएकोे भन्दै नेता राठौरले आक्रोश व्यक्त गरे । आफूहरुले पनि विगतमा गिरिजाप्रसाद कोइराला र सुशील कोइरालाको कार्यशैलीको विरोध गरेको तर, उहाँहरुको योगदानको अवमूल्यन कहिल्यै नगरेको सहमहामन्त्री राठौरले बताए । पार्टीले १५औं महाधिवेशन र आमनिर्वाचनको तयारी संगसंगै अघि बढाएको जानकारी दिँदै सिद्धान्त, आस्था र संगठनले जित्ने पार्टी नेतृत्व र काँग्रेसले जित्ने निर्वाचनका लागि तल्लोदेखि माथिल्लो तहसम्मका नेता कार्यकर्ता सक्रिय हुनु पर्ने उनले बताए ।

प्रकाशित मिति: शुक्रबार, मंसिर २६, २०८२ २०:२१

प्रतिक्रिया दिनुहोस्