'व्यस्त जीवनशैलीमा स्वास्थ्य सन्तुलनका लागि ध्यान अपरिहार्य'

समाचार

गृहपृष्ठ
समाचार
'व्यस्त जीवनशैलीमा स्वास्थ्य सन्तुलनका लागि ध्यान अपरिहार्य'

'व्यस्त जीवनशैलीमा स्वास्थ्य सन्तुलनका लागि ध्यान अपरिहार्य'

आइतबार, पुस ६, २०८२ बागेश्वरी पोस्ट

नेपालगञ्ज । विश्व ध्यान दिवसको अवसरमा नेपालगञ्जमा पनि विविध कार्यक्रम गरिएको छ । योग समिति नेपाल र चिकित्सक संघ भेरी शाखाको संयुक्त आयोजनामा विश्व ध्यान दिवसका सन्दर्भमा आज विविध कार्यक्रम गरी मनाइएको छ । योगमा समर्पितहरुको विशेष उपस्थितिमा सामूहिक ध्यान गर्दै यसको महत्त्व र उपादेयताबारे जानकारी गराइएको थियो । योग समिति नेपालका अध्यक्ष तथा योगगुरु आयुर्वेदाचार्य गिरिराजले मानव जीवनमा ध्यानको महत्वबारे विस्तृत प्रवचन दिँदै दैनिक जीवनको व्यस्ततालाई केही समय मात्र ध्यानमा समर्पित गर्न सकिए मानसिक शान्ति प्राप्त हुनुका साथै शारीरिक रूपमा पनि निरोगी बन्न ठूलो सहयोग पुग्ने बताए ।

योगगुरु भट्टराईले ध्यानको नियमित अभ्यासले तनाव, चिन्ता जस्ता मानसिक समस्यालाई कम गर्नुका साथै विभिन्न प्रकारका नसर्ने रोगहरूबाट बच्न पनि मद्दत पुग्ने उल्लेख गरे । ध्यान केवल शारीरिक अभ्यास मात्र नभई अनुशासित, सन्तुलित र सकारात्मक जीवनशैलीको मार्गदर्शक भएको पनि उनले बताए । चिकित्सक संघ भेरी शाखाका अध्यक्ष डा. रूपानन्द अधिकारीले चिकित्सकीय दृष्टिले ध्यानको प्रभावका विषयमा जानकारी दिँदै ध्यानले उच्च रक्तचाप, अनिद्रा, मानसिक तनाव र भावनात्मक असन्तुलनमा लाभ पुर्‍याउने बताए । ध्यानलाई जीवनशैलीमा समावेश गर्दा व्यक्ति मात्र नभई परिवार र समाज पनि स्वस्थ रहने उनले बताए ।

May be an image of one or more people, flute, temple, dais and text

कार्यक्रममा योग समिति नेपालका योग प्रशिक्षक, आजीवन तथा साधारण सदस्य, चिकित्सक लगायत चार सय भन्दा बढी योगी तथा स्वास्थ्यप्रेमीहरूको सहभागिता रहेको योग समिति नेपालकी उपाध्यक्ष लोकमाया सुवेदी ‘सुमित्रा’ ले जानकारी दिइन् । कार्यक्रमको सञ्चालन योग समिति नेपालका सचिव चिरञ्जीवी ज्ञवालीले गरेका थिए । ध्यान दिवसले ध्यानप्रति जनचेतना अभिवृद्धि गर्नुका साथै स्वस्थ, सन्तुलित र शान्त जीवनशैलीतर्फ प्रेरित गर्ने अपेक्षा गरिएको छ ।

May be an image of yoga and temple May be an image of flute, temple, dais and text