स्वर्गीय सुशील कोइरालाको क्षेत्रलाई यस पटक फर्काउँछौंः सुधान्शु

राजनीति

गृहपृष्ठ
राजनीति
स्वर्गीय सुशील कोइरालाको क्षेत्रलाई यस पटक फर्काउँछौंः सुधान्शु

स्वर्गीय सुशील कोइरालाको क्षेत्रलाई यस पटक फर्काउँछौंः सुधान्शु

शनिबार, माघ १०, २०८२ बागेश्वरी पोस्ट

नेपालगञ्ज । नेपाली कांग्रेसका युवा नेता सुधान्सु कोइरालाले संविधान पिता, पूर्व प्रधानमन्त्री एवम् कांग्रेसका पूर्व सभापति स्वर्गीय सुशील कोइरालाको निर्वाचन क्षेत्र बाँके–२ लाई यसपटक फर्काएर ल्याउने उद्घोष गरेका छन् । नेपाली कांग्रेस बाँकेका सचिव समेत रहेका कोइराला क्षेत्र नम्बर २ मा आसन्न प्रतिनिधि सभा सदस्य पदको उम्मेदवार हुन् । आगामी फागुन २१ गते हुन लागेको प्रतिनिधि सभा सदस्य निर्वाचनको पूर्व तयारीका सन्दर्भमा निर्वाचन प्रचार–प्रसार समितिले शनिबार आयोजना गरेको जिल्ला स्तरीय बृहत छलफल कार्यक्रमलाई सम्बोधन गर्दै उनले क्षेत्र नम्बर २ मा नेपाली कांग्रेसलाई माया गर्ने जनताहरु धेरै रहेको बताए ।

‘क्षेत्र नम्बर २ मा यसपाली नेपाली कांग्रेसले झण्डा गाड्नेछ, कांग्रेसको संगठन यति बलियो छ, नेपाली कांग्रेसलाई माया गर्ने जनताहरु हुनुहुन्छ,’ उनले भने, ‘विगतमा हामीबाट कमीकमजोरी भयो, गठबन्धनका नाममा हामीले रुखमा भोट हाल्न बिर्सिसकेका थियौं, सुशील कोइरालाको क्षेत्रलाई हामीले रुख चिन्हमा भोट हालेर यसपटक फर्काएर ल्याउनेछौं ।’ क्षेत्र नम्बर २ जतिकै बाँकेको क्षेत्र नम्बर १ र ३ मा पनि आम जनताले नेपाली कांग्रेसलाई माया गर्ने उनको भनाई छ । आफू निर्वाचित भएपछि संविधान पिता सुशील कोइरालाको निष्ठालाई कायम गरेर देखाउने र कांग्रेसका सबै क्रियाशील सदस्यको सम्मानमा कमी हुन नदिने उम्मेदवार सुधान्शुले प्रतिबद्धता जनाए ।

कांग्रेसले यसपटक आफूलाई युवा अनुहार स्वरुप उम्मेदवारका रुपमा प्रस्तुत गरेको उनले बताए । ‘म हाम्रो पार्टी सभापति आदरणीय गगन थापाज्यु लगायत सबै नेताहरुलाई धन्यवाद दिन चाहन्छु, सबैको आशिर्वाद लिएर म अगाडि बढ्नेछु, हामी भनेको रुख नै हो, चार तारे नै हो,’ उनले थपे, ‘म हजुरहरुमाझ आशिर्वाद लिन आएको छु, वडा तहदेखिका सबै नेताहरुले आशिर्वाद दिनुहुनेछ, पूर्व प्रधानमन्त्री एवम् पूर्व सभापति स्वर्गीय सुशील कोइरालाको क्षेत्र पनि हो, यो क्षेत्रमा हामीले झण्डा गाड्ने कुरा भइसकेको छ ।’ हेभिवेट उम्मेदवारको प्रसंग कोट्याउँदै कोइरालाले कांग्रेसले बाँके–२ सहित देशभरका ७७ वटै जिल्लामा आफ्ना हेभिवेट उम्मेदवार उठाएको दाबी गरे ।

प्रकाशित मिति: शनिबार, माघ १०, २०८२ २१:०५

प्रतिक्रिया दिनुहोस्