एमाले उम्मेदवारहरु नरैनापुर पुगे, इश्तियाक राईले मागे सूर्य ढकालका लागि भोट

राजनीति

गृहपृष्ठ
राजनीति
एमाले उम्मेदवारहरु नरैनापुर पुगे, इश्तियाक राईले मागे सूर्य ढकालका लागि भोट

एमाले उम्मेदवारहरु नरैनापुर पुगे, इश्तियाक राईले मागे सूर्य ढकालका लागि भोट

बुधबार, माघ १४, २०८२ बागेश्वरी पोस्ट

नरैनापुर । बाँके क्षेत्र नम्बर २ मा एमालेबाट प्रतिनिधि सभा सदस्यका उम्मेदवार मोहम्मद इश्तियाक राईले आफूलाई नरैनापुरले राजनीतिमा स्थापित गरेको बताएका छन् । आज क्षेत्र नम्बर १ स्थित नरैनापुरमा आयोजित उम्मेदवारहरूसँग भेटघाट तथा विस्तारित बैठकलाई सम्बोधन गर्दै राईले आफ्नो राजनीतिको सुरूआती समयमा नरैनापुरले देखाएको माया र भरोसाले नै आफू यहाँसम्म आइपुगेको बताए ।

नरैनापुरसँग जोडिएका आफ्ना इतिहासहरूको स्मरण गर्दै राईले भने, ‘मलाई इश्तियाक राई बनाएको नरैनापुरले हो । यसका लागि म सधैं आभारी रहन्छु । तपाइँहरूले मप्रति लगाएको ऋणका लागि म सुक्रिया अदा गर्दछु ।’ आफूहरू बीचको पूरानो सम्बन्ध, आपसी इज्जत र मायामा कुनै ह्रास नआएको बताएका एमाले उम्मेदवार राईले यो निर्वाचन विकास निर्माण गर्ने र ध्वंश गर्नेहरू बीचको लडाइँ भएको जिकिर गरे ।

भदौ २४ गतेको घटनाले देशमा माओवादी द्वन्दमा भन्दा पनि ज्यादा क्षति भएको राईको दाबी छ । उनले भने ‘ देश बनाउने भन्दै आएका स्वार्थी समूहका व्यक्तिहरूले देशको न्यायालय, सुरक्षा र प्रशासनिक संरचनाहरूमा आगो लगाए । जसबाट माओवादीको १० वर्षे द्वन्द भन्दा पनि बढी क्षति भयो । ४ घण्टामै देशमा ठूलो ध्वंश भयो ।’

राईले बाँके क्षेत्र नं १ मा एमालेका उम्मेदवार सूर्य ढकाललाई जिताउन नरैनापुरवासीसँग अपिल पनि गरे । ‘तपाइँहरू क्षेत्र नं २ बाट मेरो सानदार जित चाहनुहुन्छ भने सूर्य ढकालजीलाई जिताउनुस् । यता तपाइँहरूले सूर्य ढकालजीलाई भोट दिनुभयो भने उता मेरो पनि थपिन्छ।’, राईले भने ।

केही गुनासाहरू भए त्यसलाई विर्सेर चुनाव चिन्ह सूर्यमा मतदान गर्न आग्रह गरेका राईले बाँधको समस्या समाधान, सुकुम्बासीको व्यवस्थापन तथा कब्रिस्तान, शमशानघाट लगायतको निर्माणका लागि यो पटक एमालेबाट आफूसहित सूर्य ढकालले पनि जित्नु जरूरी रहेको भनाई राखे । राईले बाँकेबाट नरैनापुर हुँदै दाङ जोड्ने सडक निर्माणको आफ्नो योजना पनि कार्यक्रममा सुनाएका थिए । क्षेत्र नम्बर ३ का उम्मेदवार सुमन मल्ल पनि नरैनापुर पुगेका थिए ।

May be an image of one or more people, temple and crowd