कामको मूल्यांकन गरेर मतदान गर्नुस्ः इश्तियाक राई

राजनीति

गृहपृष्ठ
राजनीति
कामको मूल्यांकन गरेर मतदान गर्नुस्ः इश्तियाक राई

कामको मूल्यांकन गरेर मतदान गर्नुस्ः इश्तियाक राई

शुक्रबार, माघ २३, २०८२ बागेश्वरी पोस्ट

‍नेपालगञ्ज । नेकपा एमालेबाट निर्वाचन क्षेत्र नम्बर २ बाँकेका प्रतिनिधिसभा सदस्य उम्मेदवार मोहम्मद इश्तियाक राईले युवाहरूलाई कामकाजी बनाउँदै आवश्यक आयआर्जन गर्न सक्षम गराउन आफू प्रयत्नरत रहेको बताएका छन् । आज वडा नम्बर २१ पुरैनीमा नेकपा एमालेको निर्वाचन लक्षित कार्यालय उद्घाटन गर्दै पूर्व मन्त्री समेत रहेका राईले स्थानीय स्तरमै युवाहरूले काम पाउने र मनग्य आम्दानी गर्न सक्ने गरी आफूले योजना बनाइरहेको बताए ।

अरूले जस्तो झुठो आश्वासन र अति महत्वाकांक्षी कुराहरू आफूले नगर्ने बताएका उम्मेदवार राईले किसानहरूले सहज र सस्तो मल पाउने वातावरण बनाउने दाबी गरे । उनले भने “चुनाव जित्नकै लागि अरूले जस्तो मल फ्याक्ट्री खोल्छु भनेर म झुठो आश्वासन दिँदैन । तर, यत्ति चाहिँ भन्छु कि किसानले चाहिएको बेलामा सहज र सस्तोमा मल पाउने वातावरण बनाउन म अग्रसर हुन्छु ।”

निर्वाचन क्षेत्र नम्बर २ मा २०७४ सालमा आफू सांसद भएपछिको ५ वर्षे कार्यकाल र आफू पराजित भएपछिको पछिल्लो ३ वर्ष तुलना गरेर मूल्यांकन गर्न पनि मतदातासमक्ष राईले आग्रह गरे । ‘‘मेरो जित हुँदाको समय र मेरो पराजय भएपछिको समय तुलना गर्दा नै स्पष्ट हुन्छ यहाँ कसले काम गर्छ, कसले काम गर्दैन ?’’ राईले भने ।

पछिल्लो तीन बर्षमा समाजमा झगडा गराउने र विभाजन ल्याउने थुप्रै घटनाहरू बाँकेमा भएको उदाहरणहरू दिँदै राईले आफू सधैं नै धार्मिक सद्भाव र एकताको पक्षमा अडिग रहेको बताए । निर्वाचन जित्नका लागि समाजमा विभाजन ल्याउन चाहनेहरूलाई समाजले चिन्नुपर्ने उनको भनाई थियो ।

आफूले यो पल्ट उल्लेख्य मत ल्याएर विजयी हुने संकेत गरेका राईले २०७९ को निर्वाचनमा २०७४ सालको भन्दा धेरै मत ल्याए पनि अन्य सबै दलहरू मिल्दा आफू पछि परेको बताए । २०७४ सालमा २१ हजार ५ सय ७५ मत ल्याएर प्रतिनिधिसभा सदस्य निर्वाचित राई २०७९ मा २३ हजार ५ सय २० मत ल्याएर पराजित भएका थिए ।

बाँकेका केही राजनीतिज्ञ र विरोधी व्यक्तिहरू सधैं नै आफूलाई अनावश्यक बदनाम गर्न लागिपरेको आरोप पनि राईले लगाए । “इश्तियाक राईले जित्यो भने आफूहरू पछि परिन्छ भन्ने डरले केही मानिसहरू असम्बन्धित कुराहरूमा पनि मलाई जोडिदिन्छन् । स्थानीय तहका कामहरूमा समेत त्यहीँका जिम्मेवार व्यक्तिलाई केही नभनेर मलाई देखाइन्छ । यस्ता गलत कुराहरू जनताले बुझ्नु जरुरी छ,” राईले भने ।

राईले आजै वडा नम्बर १३ का मतदाताहरूसँग घरघरमै पुगेर भेटघाट गरेका थिए ।

प्रकाशित मिति: शुक्रबार, माघ २३, २०८२ १९:१०

प्रतिक्रिया दिनुहोस्