सीमा क्षेत्रका जनता नेपाली भूमीको सच्चा पहरेदार हुन्ः उम्मेदवार पुन

राजनीति

गृहपृष्ठ
राजनीति
सीमा क्षेत्रका जनता नेपाली भूमीको सच्चा पहरेदार हुन्ः उम्मेदवार पुन

सीमा क्षेत्रका जनता नेपाली भूमीको सच्चा पहरेदार हुन्ः उम्मेदवार पुन

शनिबार, फागुन २, २०८२ बागेश्वरी पोस्ट

बाँके (खजुरा) । नेपाली भूमीको सच्चा पहरेदार सीमावर्ती क्षेत्रका जनता भएको नेपाली कांग्रेस लुम्बिनी प्रदेश सभापति अमर सिंह पुनले बताएका छन् । बाँके खजुरा गाउँपालिका वडा नम्बर १ का जनतासँग भेटघाट गर्ने क्रममा लुम्बिनी प्रदेश सभापति पुनले नेपाली भूमीको रक्षा गर्ने सीमा क्षेत्रका जनता धन्यवादको पात्र भएको बताए । उनले भने, ‘सीमा क्षेत्रमा बसोबास गर्ने नागरिकलाई म आत्मादेखि नै धन्यवाद दिन चाहन्छु । जय नेपाल भन्न चाहन्छु । तपाईंहरु नेपाली भूमीको पहरेदार हो । यो भूमीलाई तपाईंहरुले नै बचाउनु भएको छ ।’ आसन्न प्रतिनिधि सभा निर्वाचनमा बाँके क्षेत्र नम्बर ३ बाट उम्मेदवारी दिएका पुनले सीमावर्ती क्षेत्रको जनताको समस्यालाई नीतिगत रुपमा समाधान गर्न आफूले पहल गर्ने बताए ।

उनले भने, ‘मेचीदेखि महाकालीसम्म सीमा क्षेत्रको समस्या छन् । त्यसको समाधान नीतिगत रुपमा राज्यले गर्नुपर्छ । मैले सीमावर्ती क्षेत्रको समस्या समाधानको लागि नीतिगत रुपमा एजेन्डा बनाएर त्यसको दिर्घकालीन समाधानको लागि प्रयास गर्नेछु ।’ बाँके क्षेत्र नम्बर ३ को दक्षिणतर्फको भूभाग नेपाल–भारतको सीमाना पर्छ । यहाँका स्थानीयहरुको जमिन बैंकले धितो राख्ने गरेको छैन । जमिन छ तर बैंकले धितो राख्दैन । जसका कारण सीमावर्ती क्षेत्रका नेपाली जनताका नागरिकले आर्थिक रुपमा पाउने सुविधाबाट बञ्चित हुनु परिरहेको छ । सीमावर्ती क्षेत्रका जनताहरुमाथि भइरहेको अन्यायलाई समाधान गर्न आफूले पहल गर्ने पुनले प्रतिवद्धता जनाए ।

उनले भने,‘सीमा क्षेत्रका जनताको जमिन बैंकले धितो नै नराख्नु अन्याय हो । मूल्यांकन रकम कम होला तर राख्नै नपाउनु भनेको यहाँको जनतामाथि राज्यले गरेको अन्याय हो ।’ सभापति पुनले बाँके क्षेत्र नम्बर ३ को समग्र विकासका नयाँ एजेन्डासहित आफू मतदाताहरुसँग भेटघाट गरिरहेको बताए । नेपालको आर्थिक उन्नतिको लागि पनि तराई क्षेत्रको विकास जरुरी रहेको बताउँदैं पुनले क्षेत्र नम्बर ३ लाई आर्थिक विकासको लागि नयाँ एजेन्डा बनाएर काम गर्ने बताए ।

प्रकाशित मिति: शनिबार, फागुन २, २०८२ २१:२०

प्रतिक्रिया दिनुहोस्