कांग्रेस क्षेत्र नम्बर १ बाँकेले भन्यो-'निर्वाचन परिणाम स्वीकार्दै बिगतका कमजोरीका गम्भीर समीक्षा गर्छौं'

राजनीति

गृहपृष्ठ
राजनीति
कांग्रेस क्षेत्र नम्बर १ बाँकेले भन्यो-'निर्वाचन परिणाम स्वीकार्दै बिगतका कमजोरीका गम्भीर समीक्षा गर्छौं'

कांग्रेस क्षेत्र नम्बर १ बाँकेले भन्यो-'निर्वाचन परिणाम स्वीकार्दै बिगतका कमजोरीका गम्भीर समीक्षा गर्छौं'

बिहीबार, फागुन २८, २०८२ बागेश्वरी पोस्ट

नेपालगञ्ज । नेपाली कांग्रेस बाँके क्षेत्र नम्बर १ ले प्रतिनिधिसभा निर्वाचन २०८२ शान्तिपूर्ण र मर्यादित वातावरणमा सम्पन्न भएकोमा सम्पूर्ण मतदाता तथा सरोकारवालाप्रति धन्यवाद व्यक्त गरेको छ ।

नेपाली कांग्रेस क्षेत्रीय कार्यसमिति क्षेत्र नम्बर १ कोहलपुर बाँकेले जारी गरेको प्रेस विज्ञप्तिमा फागुन २१ गते सम्पन्न निर्वाचन लोकतान्त्रिक अभ्यासका रूपमा सफलतापूर्वक सम्पन्न भएको उल्लेख गरिएको छ । विज्ञप्तिमा निर्वाचनलाई शान्तिपूर्ण र व्यवस्थित रूपमा सम्पन्न गराउन सहयोग पुर्‍याउने मतदाता, निर्वाचन आयोग, सुरक्षाकर्मी, सञ्चारकर्मी तथा नागरिक समाजप्रति आभार व्यक्त गरिएको छ । क्षेत्रीय सभापति पोषण केसीले जारी गरेको विज्ञप्तीमा निर्वाचनले नेपाली जनताको सार्वभौम अधिकार पुनः पुष्टि गरेको उल्लेख गर्दै लोकतान्त्रिक मूल्य–मान्यता, संविधानको रक्षा र राष्ट्रिय एकताको सुदृढीकरणमा सबै पक्ष जिम्मेवार हुनुपर्नेमा जोड दिइएको छ ।

त्यस्तै, निर्वाचन परिणामलाई सहज रूपमा स्वीकार गर्दै लोकतान्त्रिक परम्परा अनुसार अघि बढ्न सबै राजनीतिक दल र उम्मेदवारलाई आग्रह गरिएको छ । लोकतन्त्रलाई बलियो बनाउन जिम्मेवार राजनीतिक व्यवहार आवश्यक रहेको पनि विज्ञप्तिमा उल्लेख छ । नेपाली कांग्रेसले यस निर्वाचनमा अपेक्षित सफलता हासिल गर्न नसकेको यथार्थ स्वीकार गर्दै कमजोरीहरूको समीक्षा, आत्मसुधार तथा संगठन सुदृढीकरण गर्दै जनताको सेवामा अझ सक्रिय हुने प्रतिबद्धता व्यक्त गरेको छ । विज्ञप्तिमा आगामी दिनमा पनि जनताको सेवा, लोकतान्त्रिक मूल्य–मान्यता तथा राष्ट्रिय हितको संरक्षणमा निरन्तर लागिरहने प्रतिवद्धता जनाइएको छ ।

May be an image of text