सञ्चारकर्मीका लागि दिइएको ‘एआई अभिमुखीकरण’ तालिम समापन

समाचार

गृहपृष्ठ
समाचार
सञ्चारकर्मीका लागि दिइएको ‘एआई अभिमुखीकरण’ तालिम समापन

सञ्चारकर्मीका लागि दिइएको ‘एआई अभिमुखीकरण’ तालिम समापन

सोमबार, जेठ ४, २०८३ बागेश्वरी पोस्ट

नेपालगञ्ज । नेपालगञ्जका सञ्चारकर्मीका लागि दिइएको कृत्रिम बुद्धिमत्ता (एआई) अभिमुखीकरण तालिम सोमबार समापन भएको छ । नेपाल पत्रकार महासंघ बाँकेको आयोजना एवम् नेपालगञ्ज उपमहानगरपालिका कार्यालयको सहयोगमा गत शुक्रबारदेखि चार दिने उक्त तालिम सुरु भएको थियो ।

समापन कार्यक्रमलाई सम्बोधन गर्दै प्रमुख अतिथि एवम् नेपाल पत्रकार महासंघ लुम्बिनी प्रदेशका अध्यक्ष शुक्रऋषि चौलागाईले पछिल्लो समयमा एआईको प्रयोगले हरेक कामलाई छिटो, छरितो बनाउन थालेको भन्दै पत्रकारका लागि पनि एआईको प्रयोग अत्यन्तै उपयोगी देखिएको बताए । तालिममा सिकेका कुरालाई पत्रकारिता पेशासँगै अन्य सिर्जनशील काममा प्रयोग गर्न सकिने उनको विश्वास छ । महासंघ बाँकेले सञ्चालन गरेको तालिममा सहभागी भएका बाहेक छुटेका अन्य पत्रकारका लागि पनि निकट भविष्यमा महासंघ लुम्बिनी प्रदेशले तालिम सञ्चालन गर्ने उनले प्रतिवद्धता जनाए । ‘यो तालिमका विषयमा पत्रकारले सार्वजनिक रुपमा टिका, टिप्पणी गर्न त्यति सार्दभिक हुँदैन, जो–जो तालिम लिन छुट्नुभएको छ, उहाँहरुलाई पत्रकार महासंघ लुम्बिनी प्रदेशले यस्तै खालको तालिम प्रदान गर्नेछ,’ अध्यक्ष चौलागाईले भने ।

May be an image of one or more people and text

नेपाल पत्रकार महासंघ बाँकेका अध्यक्ष नवीन गिरीले एआई सम्बन्धि तालिम पत्रकारहरुको लागि रुचीको विषय भएकाले सञ्चालन गरिएको बताए । ‘नेपालगञ्ज उपमहानगरपालिकाले महासंघलाई छुट्याएको बजेटबाट यो तालिम चलाएका हौं,’ उनले भने, ‘तालिम पक्कै पनि उपयोगीमूलक भयो भन्ने हामीलाई विश्वास छ ।’ महासंघले आगामी दिनमा पनि पत्रकारको क्षमता विकास सम्बन्धि तालिम सञ्चालन गर्दै जाने अध्यक्ष गिरीले बताए ।

महासंघ बाँकेका सचिव कृष्ण ओलीका अनुसार तालिममा ४० जना पत्रकारहरुको सहभागिता रहेको थियो । उक्त तालिममा जीवन भण्डारी र उमंग निरौलाले सहजीकरण गरेका थिए । तालिमको उद्घाटन यसअघि नेपालगञ्ज उपमहानगरपालिकाका नगर प्रमुख प्रशान्त विष्टले गरेका थिए ।

प्रकाशित मिति: सोमबार, जेठ ४, २०८३ २०:४७

प्रतिक्रिया दिनुहोस्