नेपालगञ्जमा दुई दशकपछि स्वर्गीय राजा वीरेन्द्रको शालिक पुनःस्थापना

समाचार

गृहपृष्ठ
समाचार
नेपालगञ्जमा दुई दशकपछि स्वर्गीय राजा वीरेन्द्रको शालिक पुनःस्थापना

नेपालगञ्जमा दुई दशकपछि स्वर्गीय राजा वीरेन्द्रको शालिक पुनःस्थापना

शनिबार, असार २०, २०८३ बागेश्वरी पोस्ट

नेपालगञ्ज । नेपालगञ्जमा दुई दशकपछि स्वर्गीय राजा वीरेन्द्र शाहको पूर्ण कदको शालिक पुनःस्थापना गरिएको छ । २०६२/६३ को दोस्रो जनआन्दोलनका क्रममा तोडफोड गरी हटाइएको शालिक शुक्रबार राति करिब दुई बजे पुनःस्थापना गरिएको हो । नेपालगञ्ज उपमहानगरपालिकाको नेतृत्वमा लामो समयदेखि हटाइएका तथा विभिन्न आन्दोलनका क्रममा क्षतिग्रस्त भएका ऐतिहासिक व्यक्तित्वका शालिकहरू पुनःस्थापना गर्ने अभियान अन्तर्गत पूर्व राजा वीरेन्द्रको शालिक पनि पुनः राखिएको हो ।

यसअघि जेनजी विद्रोहका क्रममा तोडफोड भएका वीपी कोइराला, पुष्पलाल श्रेष्ठ, गणेशमान सिंह तथा सहिद सेतु विकका शालिकहरू पनि पुनःस्थापना भइरहेको उपमहानगरपालिकाले जनाएको छ । नेपालगञ्जका विभिन्न चोकमा रहेका अधिकांश ऐतिहासिक शालिकहरू अहिले पुनःस्थापित भएका छन् । यसअघि नै दोस्रो जनआन्दोलनका क्रममा हटाइएको स्वर्गीय राजा त्रिभुवनको शालिक पनि पुनःस्थापना गरिएको थियो ।

नेपालगञ्ज उपमहानगरपालिकाका प्रमुख प्रशान्त विष्टले लामो समयदेखि पुनःस्थापना हुन बाँकी रहेका तथा विभिन्न आन्दोलनका क्रममा क्षतिग्रस्त भएका सबै ऐतिहासिक शालिकहरू क्रमशः पुनःस्थापना गरिएको बताए । उनका अनुसार इतिहास, संस्कृति र समाजका विभिन्न कालखण्डसँग जोडिएका व्यक्तित्वहरूको सम्मान तथा सार्वजनिक सम्पदाको संरक्षण गर्ने उद्देश्यले यो अभियान सञ्चालन गरिएको हो । सर्वदलीय र सर्वपक्षीय बैठक पश्चात् नगर कार्यपालिकाको बैठकबाट निर्णय गरेर पूर्व राजा विरेन्द्र शाहको पूर्ण कदको शालिक पुनःस्थापना गरिएको नगर प्रमुख विष्टले बताए । इतिहासलाई संरक्षण गर्नु नेपालगञ्ज उपमहानगरपालिकाको दायित्व र कर्तव्य भएको उनको भनाइ छ ।

प्रकाशित मिति: शनिबार, असार २०, २०८३ ०९:५८

प्रतिक्रिया दिनुहोस्