महासंघ बाँकेको बैठकः पत्रकारिताको मर्यादा जोगाउन आग्रह, उपाध्यक्षमा मल्ललाई जिम्मेवारी हस्तान्तरण

समाचार

गृहपृष्ठ
समाचार
महासंघ बाँकेको बैठकः पत्रकारिताको मर्यादा जोगाउन आग्रह, उपाध्यक्षमा मल्ललाई जिम्मेवारी हस्तान्तरण

महासंघ बाँकेको बैठकः पत्रकारिताको मर्यादा जोगाउन आग्रह, उपाध्यक्षमा मल्ललाई जिम्मेवारी हस्तान्तरण

शनिबार, साउन २, २०८३ बागेश्वरी पोस्ट

नेपालगञ्ज । नेपाल पत्रकार महासंघ बाँके शाखाले पत्रकारिताको नाममा भइरहेका केही गैरजिम्मेवार र आचारसंहिता विपरीतका गतिविधिप्रति गम्भीर ध्यानाकर्षण भएको जनाएको छ ।

शाखाको कार्यसमिति बैठकले ‘क्यामेरा, बुम, परिचयपत्र’ बोकेपछि जहाँसुकै र जुनसुकै अवस्थामा पनि स्वतः पहुँच र प्रभाव स्थापित हुन्छ भन्ने गलत मानसिकताबाट प्रेरित गतिविधिले पत्रकारिता पेशाको गरिमा, पेशागत आचारसंहिता, नैतिक मूल्य–मान्यता तथा जनविश्वासमा प्रश्न उठाएको निष्कर्ष निकालेको हो ।

महासंघ बाँकेले पत्रकारिताको नाममा गरिने गैरजिम्मेवार, अमर्यादित तथा आचारसंहिता विपरीतका गतिविधि पत्रकारिता कर्मको परिभाषाभित्र नपर्ने स्पष्ट पारेको छ । शाखाले सत्य, तथ्य, निष्पक्षता, व्यावसायिकता, जिम्मेवारी, जवाफदेहिता र उत्तरदायित्वमा आधारित पत्रकारिता अभ्यास गर्न सम्पूर्ण सञ्चारकर्मीलाई आग्रह गरेको छ ।

शाखा अध्यक्ष नवीन गिरीको अध्यक्षतामा बाँकेको पर्यटकीय क्षेत्र गाभर भ्यालीमा बसेको बैठकले पत्रकारिताको विश्वसनीयता कायम राख्न पेशागत मर्यादा र आचारसंहिताको पालना अनिवार्य रहेको जनाएको छ ।

बैठकले नेपाल पत्रकार महासंघ बाँकेको २०८१ मंसिर २८ गते सम्पन्न निर्वाचनमा खुला उपाध्यक्ष पदमा बराबर मत प्राप्त गरेका तिलक गाउँले र रेजिना मल्लबीच भएको सहमति अनुसार उपाध्यक्ष गाउँलेले आफ्नो आधा कार्यकाल पूरा गरेपछि बाँकी कार्यकालका लागि रेजिना मल्ललाई जिम्मेवारी हस्तान्तरण गर्ने निर्णय गरेको छ ।

यसैगरी, शाखाले गत आर्थिक वर्षमा वार्षिक कार्ययोजना अनुसार सञ्चालन गरिएका कार्यक्रम तथा गतिविधि उपलब्धिमूलक र प्रभावकारी रहेको समीक्षा गर्दै आगामी आर्थिक वर्षमा पत्रकारको पेशागत क्षमता अभिवृद्धि, संस्थागत सुदृढीकरण, प्रेस स्वतन्त्रताको संरक्षण तथा सदस्य हितलाई प्राथमिकतामा राखेर थप प्रभावकारी कार्यक्रम सञ्चालन गर्ने निर्णय गरेको सचिव कृष्ण ओलीद्वारा जारी विज्ञप्तीमा उल्लेख छ ।

बैठकले बाँकेको प्रमुख पर्यटकीय गन्तव्य गाभर भ्याली र होमस्टे संस्कृतिको प्रवद्र्धन, स्थानीय पर्यटन विकास तथा प्राकृतिक सम्पदाको संरक्षण, वातावरणीय सचेतना अभिबृद्धिका लागि सम्बन्धित निकाय र सरोकारवालासँग सहकार्य गर्दै प्रचारप्रसार तथा जनचेतनामूलक गतिविधिमा सक्रिय सहभागिता जनाउने निर्णय समेत गरेको छ ।

प्रकाशित मिति: शनिबार, साउन २, २०८३ १९:२६

प्रतिक्रिया दिनुहोस्