मानव बेचबिखनको बदलिँदो स्वरूपबारे नेपालगञ्जमा अन्तरक्रिया

समाचार

गृहपृष्ठ
समाचार
मानव बेचबिखनको बदलिँदो स्वरूपबारे नेपालगञ्जमा अन्तरक्रिया

मानव बेचबिखनको बदलिँदो स्वरूपबारे नेपालगञ्जमा अन्तरक्रिया

बुधबार, साउन ६, २०८३ बागेश्वरी पोस्ट

नेपालगञ्ज । मानव बेचबिखन तथा असुरक्षित बसाइँसराइको बदलिँदो स्वरूपबारे नेपालगञ्जमा अन्तरक्रिया कार्यक्रम सम्पन्न भएको छ । फ्री अ गर्ल नेदरल्यान्ड्सको सहयोग तथा माइती नेपालको आयोजनामा बुधबार आयोजित कार्यक्रममा मानव बेचबिखनका नयाँ प्रवृत्ति, सीमावर्ती जिल्लाको अवस्था, उद्धार, पुनःस्थापना तथा न्यूनीकरणका लागि आवश्यक सामूहिक पहलका विषयमा छलफल गरिएको थियो ।

कार्यक्रममा माइती नेपाल नेपालगञ्जका प्रमुख केशव कोइरालाले गत आर्थिक वर्षको तथ्यांक प्रस्तुत गर्दै नेपाल प्रहरी र माइती नेपालको समन्वयमा जोखिमपूर्ण यात्रामा रहेका ५७२ जनालाई जमुनाह सीमावर्ती नाकाबाट उद्धार गरिएको जानकारी दिए । उद्धार गरिएकामध्ये ९८ जना बाँके जिल्लाका रहेका छन् । बाँकी अन्य जिल्लाका छन् । उहाँका अनुसार उद्धार गरिएकामध्ये अधिकांश कोहलपुर, बैजनाथ, राप्तीसोनारी, खजुरा, डुडुवा, नरैनापुर र नेपालगञ्ज क्षेत्रका हुन् । त्यसमा सबैभन्दा बढी २९ जना कोहलपुरका छन् ।

खोजतलास तथा उद्धारका लागि निवेदन परेको संख्या ८१७ छ । जसमा बाँकेका मात्र १८७ जना छन् । त्यसमध्ये १८ बर्ष माथिका महिला ३३६ र पुरुष ३ जना छन् भने १८ बर्ष मुनिका बालबालिकामध्ये १७४ जना बालिका र १०४ जना बालक छन् । यसैगरी भारत तथा खाडी मुलुकबाट श्रम तथा यौन शोषणमा परेका महिला तथा बालबालिकाको संख्या ९ जना रहँदा बाँकेका ५ जना छन् ।

कार्यक्रममा भारत तथा तेस्रो मुलुकमा श्रम तथा यौन शोषणको जोखिममा परेका महिला तथा बालबालिकाको उद्धार, सुरक्षित बसाइँसराइसम्बन्धी जनचेतना अभिवृद्धि, सीमा क्षेत्रमा निगरानी सुदृढीकरण तथा सरोकारवाला निकायबीचको समन्वयलाई थप प्रभावकारी बनाउनुपर्नेमा जोड दिइएको छ । साथै बाँके जिल्ला मानव बेचबिखनको स्रोत, ट्रान्जिट र गन्तव्य तीनै रूपमा प्रभावित रहेको तथ्य पनि औँल्याइएको थियो ।

कार्यक्रमका प्रमुख अतिथि नेपालगञ्ज उपमहानगरपालिकाका नगर प्रमुख प्रशान्त विष्टले मानव बेचबिखन जस्तो जघन्य अपराध नियन्त्रणका लागि सरकारी निकाय, सुरक्षा निकाय, स्थानीय तह, सञ्चारमाध्यम तथा समुदायबीचको सहकार्य अपरिहार्य रहेको बताए । उनले सुरक्षित बसाइँसराइसम्बन्धी जनचेतना विस्तार, रोजगारीका अवसर सिर्जना तथा जोखिममा रहेका समुदायलाई लक्षित कार्यक्रम सञ्चालन गर्नुपर्नेमा जोड दिए । स्थानीय सरकारले मानव बेचबिखन नियन्त्रण तथा पीडितको पुनःस्थापनाका लागि आवश्यक सहयोग र समन्वयलाई निरन्तरता दिने प्रतिबद्धता पनि व्यक्त गरे।

अन्तरक्रियामा नेपाल प्रहरी, नेपालगञ्ज उपमहानगरपालिका, नेपाल पत्रकार महासंघ, विभिन्न संघसंस्थाका प्रतिनिधिहरूको सहभागिता रहेको थियो । सहभागीहरूले मानव बेचबिखन नियन्त्रणका लागि कानुनी कार्यान्वयनसँगै समुदायस्तरमा सचेतना, आर्थिक सशक्तीकरण र सीमावर्ती क्षेत्रमा प्रभावकारी निगरानीलाई थप सुदृढ बनाउनुपर्ने धारणा व्यक्त गरेका थिए । नेपालगञ्ज उपमहानगरपालिकाका निमित्त प्रमुख प्रशासकीय अधिकृत गार्ख बहादुर थापाको अध्यक्षतामा सम्पन्न कार्यक्रममा इलाका प्रहरी कार्यालय जमुनाहका इन्चार्ज प्रहरी निरीक्षक राजन प्रसाद भट्टराई, नेपाल पत्रकार महासंघ बाँकेका अध्यक्ष नवीन गिरी, गैरसरकारी संस्था महासंघ बाँकेका अध्यक्ष मन भण्डारी, अधिकारकर्मी प्रकाश उपाध्याय लगायत सरोकारवालाले आफ्ना धारणा एवम् सुझाबहरु राखेका थिए ।

प्रकाशित मिति: बुधबार, साउन ६, २०८३ १९:५५

प्रतिक्रिया दिनुहोस्