पुष्पलाल स्मृति दिवसः नेपालगञ्जमा एकै मञ्चमा वाम नेताहरू !

राजनीति

गृहपृष्ठ
राजनीति
पुष्पलाल स्मृति दिवसः नेपालगञ्जमा एकै मञ्चमा वाम नेताहरू !

पुष्पलाल स्मृति दिवसः नेपालगञ्जमा एकै मञ्चमा वाम नेताहरू !

बिहीबार, साउन ७, २०८३ बागेश्वरी पोस्ट

नेपालगञ्ज । नेपालगञ्जमा विभिन्न कम्युनिष्ट दलका नेता तथा कार्यकर्ता एकै मञ्चमा उभिँदै ४८औँ पुष्पलाल स्मृति दिवस मनाएका छन् ।

नागरिक सरोकार मञ्चको आयोजनामा सम्पन्न कार्यक्रममा सहभागी नेताहरूले वर्तमान राजनीतिक परिस्थितिमा कम्युनिष्ट शक्तिहरूबीच एकता अपरिहार्य रहेको धारणा राखे । उनीहरूले व्यक्तिगत अहंकार, दम्भ र विभाजनको राजनीति त्यागेर साझा उद्देश्यका साथ अघि बढ्नुपर्नेमा जोड दिए ।

कार्यक्रममा एमालेका पुराना नेताहरु नन्दलाल रोकाय, बाबुराम गौतम, देवराज भार, नेकपाका तिलक परियार, पूर्णाकुमारी सुवेदी, महेश्वर गहतराज लगायतले कम्युनिष्ट शक्तिहरू एकताबद्ध भएमा मुलुकको राजनीतिक स्थायित्व र विकासमा सकारात्मक योगदान पुग्ने बताए । उनीहरूले कम्युनिष्ट एकताका लागि बाँकेबाटै सशक्त सन्देश र दबाब सिर्जना गर्नुपर्ने धारणा पनि व्यक्त गरे ।

नागरिक सरोकार मञ्चका संयोजक मधुसुदन रिजालले स्वागत मन्तव्य राखेको कार्यक्रमको विषय प्रवेश नरेन्द्रजंग पिटरले गरेका थिए । वक्ताहरूले नेपालका प्रथम जनवादी कम्युनिष्ट नेता पुष्पलाल श्रेष्ठको राजनीतिक योगदान, विचार र मार्गदर्शन आज पनि सान्दर्भिक रहेको उल्लेख गरे ।

लामो समयपछि एमाले, नेकपा, क्रान्तिकारी कम्युनिष्ट पार्टी लगायत विभिन्न वामपन्थी दलका नेताहरू एउटै कार्यक्रममा सहभागी हुनु राजनीतिक रूपमा अर्थपूर्ण मानिएको छ ।

यता, नेपाली कांग्रेससँग प्रदेश तहमा एमालेको सहकार्यबारे विभिन्न राजनीतिक चर्चा चलिरहेका बेला जिल्लास्तरमा भने कम्युनिष्ट शक्तिहरूबीच संवाद र सहकार्यको वातावरण बन्न थालेको संकेत यस कार्यक्रमले दिएको सहभागीहरूको भनाइ छ । कार्यक्रम संचालन पत्रकार झलक गैरेले गरेका थिए ।

प्रकाशित मिति: बिहीबार, साउन ७, २०८३ २१:४३

प्रतिक्रिया दिनुहोस्