बाँके र बर्दियामा विश्व बाघ दिवस मनाइयो

समाचार

गृहपृष्ठ
समाचार
बाँके र बर्दियामा विश्व बाघ दिवस मनाइयो

बाँके र बर्दियामा विश्व बाघ दिवस मनाइयो

बुधबार, साउन १३, २०८३ बागेश्वरी पोस्ट

नेपालगञ्ज । विश्व बाघ दिवस २०२६ को अवसरमा बाँकेको राप्ती सोनारी गाउँपालिकामा मानव–वन्यजन्तु द्वन्द्व न्यूनीकरणसम्बन्धी अन्तरक्रिया कार्यक्रम सम्पन्न भएको छ । बास नेपालको आयोजना तथा डिभिजन वन कार्यालय बाँके, राप्ती सोनारी गाउँपालिका–६, ताल परियोजना र इन्रुडेक कोहलपुरको सहकार्यमा आयोजित कार्यक्रममा मानव–वन्यजन्तु द्वन्द्व न्यूनीकरण, बाघ संरक्षण तथा स्थानीय समुदायको भूमिकाबारे छलफल गरिएको थियो ।

कार्यक्रममा राप्ती सब–डिभिजन वन कार्यालयका प्रमुख रामगणेश शाहले मानव–वन्यजन्तु द्वन्द्व न्यूनीकरणका लागि सबै सरोकारवाला निकाय र स्थानीय समुदायबीच सकारात्मक सोच, समन्वय र सहकार्य आवश्यक रहेको बताए । ताल परियोजना कोहलपुरका भरतप्रसाद भट्टले अन्तरक्रियाबाट प्राप्त सुझावका आधारमा संरक्षणका कार्यक्रमलाई थप प्रभावकारी बनाउँदै लैजाने प्रतिबद्धता व्यक्त गरे । कार्यक्रममा ताल परियोजनाका प्रतीक शाह र इन्रुडेक कोहलपुरका विराट लामिछानेले पनि आफ्ना धारणा राखेका थिए ।

कार्यक्रमको प्रारम्भमा बास नेपालका निर्देशक हेमराज भट्टले विश्व बाघ दिवसको इतिहास, बाँके राष्ट्रिय निकुञ्जको स्थापना, बाघ संरक्षणका लागि भइरहेका प्रयास तथा वर्तमान अवस्थाबारे प्रस्तुतीकरण गरेका थिए । बास नेपालका केन्द्रीय अध्यक्ष शिवकुमार वर्माको अध्यक्षतामा सम्पन्न कार्यक्रमको सञ्चालन जनसम्पर्क अधिकृत माधव कार्कीले गरेका थिए । कार्यक्रममा धन्यवाद ज्ञापन गर्दै अध्यक्ष वर्माले बाघ संरक्षणमा समुदायको सक्रिय सहभागिता र सबै पक्षबीचको सहकार्य अपरिहार्य रहेको बताए । अन्तरक्रियामा विभिन्न सामुदायिक वनका पदाधिकारी, स्थानीयवासी तथा सरोकारवाला निकायका प्रतिनिधिहरुको सहभागिता रहेको थियो।

यसैबीच, विश्व बाघ दिवसकै अवसरमा बर्दियाको ठाकुरद्वारामा पनि अन्तरक्रिया कार्यक्रम सम्पन्न भएको छ । बर्दिया राष्ट्रिय निकुञ्ज कार्यालयको आयोजना तथा बास नेपाल लगायत विभिन्न संस्थाको सहकार्यमा आयोजित कार्यक्रममा बाघ संरक्षण, मानव–वन्यजन्तु द्वन्द्व न्यूनीकरण र जैविक विविधता संरक्षणमा सरोकारवाला निकाय तथा स्थानीय समुदायको साझा प्रतिबद्धतामा जोड दिइएको थियो ।

प्रकाशित मिति: बुधबार, साउन १३, २०८३ २१:४१

प्रतिक्रिया दिनुहोस्