नेपालगन्जमा शनिबार विहान सद्भाव र्‍याली निकालिने

समाचार

गृहपृष्ठ
समाचार
नेपालगन्जमा शनिबार विहान सद्भाव र्‍याली निकालिने

नेपालगन्जमा शनिबार विहान सद्भाव र्‍याली निकालिने

शुक्रबार, साउन १५, २०८३ बागेश्वरी पोस्ट

नेपालगञ्ज । सुनसरी र सिराहामा भएका घटनापछि सामाजिक सद्भाव र धार्मिक सहिष्णुता कायम राख्ने उद्देश्यले नेपालगन्जमा शनिबार सद्भाव र्‍याली आयोजना गरिने भएको छ । र्‍याली बिहान ७:३० बजे बी.पी. चोकबाट सुरु भई धम्बोझी (वीरेन्द्र चोक) सम्म पुग्नेछ । जिल्ला प्रशासन कार्यालय बाँकेमा आज आयोजित सर्वपक्षीय/सर्वदलीय वैठकले यस्तो निर्णय गरेको हो । र्‍यालीमा सबै सरोकारवालाको सहभागिताका लागि आह्वान गरिएको छ ।

वैठकले सुनसरीको देवानगञ्ज–३ कप्तानगञ्जमा साउन १० गते भएको घटनामा मृत्यु भएका ओमप्रकाश मेहता, जयप्रकाश मेहता तथा सिराहामा साउन १४ गते भएको घटनामा मृत्यु भएका गणेश यादवप्रति श्रद्धाञ्जली व्यक्त गर्दै सामाजिक सद्भाव र धार्मिक सहिष्णुता कायम राख्न तीन बुँदे निर्णय गरेको प्रमुख जिल्ला अधिकारी दिलकुमार तामाङले बताए । सुनसरी घटनापछि देशका विभिन्न स्थानमा शान्ति र सद्भाव कायम राख्न पहल भइरहेको सन्दर्भमा बाँकेमा पनि यस्तो निर्णय गरिएको हो ।

बैठकले मृतकहरूप्रति श्रद्धाञ्जली व्यक्त गर्दै शोकसन्तप्त परिवारजनमा गहिरो समवेदना प्रकट गरेको छ । साथै, घटनामा घाइते भएकाहरूको शीघ्र तथा पूर्ण स्वास्थ्यलाभको कामना गर्दै घटनाको निष्पक्ष छानबिन गरी दोषीमाथि कानुन बमोजिम कडा कारबाही गर्न नेपाल सरकारसँग माग गर्ने निर्णय गरेको छ ।

बैठकले यसअघि सर्वदलीय तथा सर्वपक्षीय बैठकबाट सार्वजनिक स्थानमा डीजे/साउन्ड सिस्टम बजाउन लगाइएको प्रतिबन्ध कडाइका साथ कार्यान्वयन गर्ने निर्णयलाई पुनः कार्यान्वयनमा जोड दिएको छ । साथै, विभिन्न धार्मिक तथा सामाजिक कार्यक्रममा हतियार प्रदर्शन नगर्ने, परम्परागत रूपमा प्रयोग हुने हतियारलाई प्रदर्शनात्मक नभई सांस्कृतिक प्रतीकका रूपमा मात्र प्रयोग गर्न आग्रह गरिएको छ ।

वैठकमा जनप्रतिनिधि, राजनीतिक दलका प्रमुख एवम् प्रतिनिधि, धार्मिक गुरुहरु, विभिन्न संघसंस्थाका प्रमुख एवम् प्रतिनिधि लगायत सरोकारवालाको उपस्थिति थियो ।

May be an image of text