नरैनापुर गाउँपालिकामा ७० जना क्वारेन्टाइनमा

समाचार

गृहपृष्ठ
समाचार
नरैनापुर गाउँपालिकामा ७० जना क्वारेन्टाइनमा

नरैनापुर गाउँपालिकामा ७० जना क्वारेन्टाइनमा

सोमबार, चैत १७, २०७६ बागेश्वरी पोस्ट

नरैनापुर( बाँके )। बाँकेको नरैनापुर गाउँपालिकामा भारतबाट फर्केकालाई क्वारेन्टाइनमा राख्न सुरु गरिएको छ । पछिल्लो समय भारतबाट आएकाहरुलाई क्वारेन्टाइनमा राख्न गाउँपालिकाले सक्रियता देखाएको छ ।

भारतका विभिन्न सहरहरुमा मजदुरी गर्न गएका स्थानीयहरुलाई गाउँपालिकाले क्वारेन्टाइनमा व्यवस्थापन गरिरहेको छ । बाहिरबाट आएकालाई १४ दिन अनिवार्य क्वारेन्टाइनमा राख्न थालिएको गाउँपालिकाका अध्यक्ष इस्तियाक अहमद शाहले बताउनुभयो ।

भारतमा अलपत्र परेका नेपाली चोर बाटो भएर आउने क्रम नरोकिएकाले नाका क्षेत्रमा निगरानी बढाएर उनीहरुको स्वास्थ्य चेकजाँच गरी अनिवार्य क्वारेन्टाइनमा बसाउन थालिएको शाहले जानकारी दिनुभयो । आइतबार मात्रै भारतबाट आएका वडा नम्बर ५ र ६ का ७० जनालाई वडा नम्बर ६ स्थित जयकिसान माविमा राखिएको वडा नम्बर २ का वडा अध्यक्ष मसुद अहमद शाहले बताउनुभयो । उनीहरु सबैको अवस्था सामान्य रहेको पाइएको छ ।

नेपालगञ्जस्थित एक होटलको क्वारेन्टाइनमा अहिले नरैनापुरका ३० जना छन् । गाउँपालिकाले कारोना आशंकित व्यक्तिहरुलाई राख्न वडा नम्बर ४ को खोदवाँस्थित नेपाल राष्ट्रिय प्राथमिक विद्यालयमा १० शैयाको क्वारेन्टाइन केन्द्र बनाएको प्रमुख प्रशासकीय अधिकृत मणिराम खरालले जानकारी दिनुभयो ।

उहाँले बाहिरबाट आएकालाई स्वास्थ्य जाँच गरी आवश्यकता अनुसार गाउँपालिकाले बनाएको क्वारेन्टाइन वा घरमै पनि एक्लै बस्ने गरी व्यवस्थापन गरिएको बताउनुभयो । उहाँले बाहिरबाट आएकालाई क्वारेन्टाइनमा बसिदिन आग्रह गर्नुभएको छ ।

प्रकाशित मिति: सोमबार, चैत १७, २०७६ ११:४०

प्रतिक्रिया दिनुहोस्